Escobar: Kështu e kemi përkrahur Kosovën…

I dërguari special i SHBA-së për Ballkanin Perëndimor, Gabriel Escobar, tha në Uashington se autoritetet serbe duhet të lirojnë pa kushte tre policët e arrestuar të Kosovës.

Escobar, Zëvendës Ndihmës Sekretari Amerikan i Shtetit, tha në një bisedë telefonike me gazetarët se SHBA po ndjek “me shumë kujdes” rastin e tre policëve të Kosovës, për të cilët Beogradi pretendon se janë arrestuar në Serbi dhe Prishtina pretendon se janë rrëmbyer në veri të Kosovës.

“Për momentin nuk i kemi të gjitha faktet dhe për këtë arsye nuk po bëjmë deklaratë, do të presim përfundimin e hetimeve. Ka dy mundësi: njëra është se ata janë rrëmbyer në Kosovë dhe janë transferuar në Serbi, dhe tjetra është se kanë kaluar kufirin dhe kanë përfunduar në Serbi. Është e qartë se ata nuk kanë pasur qëllim të jenë në Serbi dhe prandaj duhet të lirohen pa kushte”, tha Escobar.

Prokuroria serbe në Kraljevë vendosi për arrestin e tyre me paraburgim, duke lëshuar urdhër për kryerjen e hetimeve ndaj tre policëve të Kosovës nën dyshimin se kanë kryer veprën penale të prodhimit, mbajtjes, dhe trafikimit të paligjshëm të armëve dhe lëndëve plasëse.

Operacioni me tre pika për de-përshkallëzimin

Lidhur me masat e ndërmarra nga Qeveria e Kosovës për arrestimin e policëve, përfshirë ndalimin e importit të mallrave nga Serbia, Escobar tha se ato duhet të shfuqizohen, sepse “nuk janë vetëm antievropiane”, pasi kufizojnë lirinë e lëvizjes, por janë edhe “të pabazuara ligjërisht”.

“Ne jemi duke punuar për një plan evropian me tre pika për të de-përshkallëzuar situatën. Kjo do të thotë që policët e Kosovës duhet të tërhiqen nga ndërtesat e vetëqeverisjes lokale në veri të Kosovës, që kryetarët e rinj të punojnë në lokacione alternative dhe se kushdo që ka kryer dhunë kundër KFOR-it duhet të ndiqet penalisht”, tha Escobar.

Ai hodhi poshtë pretendimet se SHBA-ja nuk e përkrah Kosovën sa duhet në dialogun me Beogradin, duke thënë se “të gjitha lëvizjet e Uashingtonit në 90 ditët e fundit ishin në favor të Kosovës”.

“Serbia nuk ka dashur të inicojë procedurën për hyrjen e Kosovës në Këshillin e Evropës, ne e kemi mbështetur Kosovën. Serbia nuk ka dashur të mbajë zgjedhje (të jashtëzakonshme) në veri të Kosovës, ne e kemi përkrahur. Ne nuk kemi bërë asgjë që është kundër interesave të Kosovës”, tha Escobar, por shtoi se këmbëngulja e Kosovës që kryetarët e sapozgjedhur të komunave në veri të vendit të punojnë nga ndërtesat komunale “ishte një përshkallëzim i panevojshëm”. /tesheshi.com/