Pas një pritje tre-mujore në Komitetin e Senatit për Marrëdhëniet me Jashtë, më në fund u mbajt dëshmia për ambasadorët e nominuar të SHBA në Kosovë dhe Bosnjë.
Dhe duket se ajo çfarë është vepruar me Berishën do ndiqet dhe me të tjerë nga politika amerikane në rajon. Sinjalet u dhanë nga dy të përzgjedhurit.
Michael Murphy është kandidati i Presidentit Joseph Biden për ambasador në Sarajevë, ndërsa Jeffrey Hovenier është emëruar për ambasador në Prishtinë.
Murphy është një diplomat me përvojë, i respektuar në Departamentin e Shtetit. Ai shërbeu në Bosnjë nga 2006 deri në 2009 si këshilltar politik në Ambasadën Amerikane dhe mbahet si shumë i kualifikuar për pozicionin e ri.
Ai tha se “do të përdorte sanksionet, veçanërisht për korrupsionin”.
Ndërsa sipas Jeffrey Hovenier, i cili u propozua për postin e ambasadorit në Prishtinë, “sfidat për shtetin e pavarur të Kosovës janë të mëdha”.
“Serbia mbështet serbët në Kosovë, gjë që është e kuptueshme, por gjithçka duhet të bëhet sipas kushtetutës së Kosovës,” u tha ai senatorëve, si dhe Beogradit dhe Prishtinës.
“Kosova është një vend i lindur nga tmerret e shpërbërjes së ish-Jugosllavisë dhe spastrimit etnik të regjimit të Millosheviçit. Shtetet e Bashkuara kanë luajtur një rol të rëndësishëm, së bashku me partnerët tanë evropianë, në mbrojtjen e qytetarëve të Kosovës dhe mbështetjen e përpjekjeve të tyre për të krijuar një shtet multietnik, demokratik,” tha Hovenier.
Ai shtoi se Kosova është një nga vendet më pro-amerikane në botë dhe një partner i ngushtë.
“Unë veçanërisht do të doja të njihja përgjigjen bujare të qytetarëve dhe qeverisë së Kosovës në akomodimin e të evakuuarve nga Afganistani.”
Dy diplomatët e emëruar duhet të konfirmohen në Senat të plotë për t’u bërë ambasadorë.
Kjo plotëson, të paktën tani për tani, ekipin amerikan për Ballkanin Perëndimor.
Gabriel Escobar është përgjegjës për dialogun Kosovë-Serbi, Mattheë Palmer është përgjegjës për Ligjin Zgjedhor dhe reformat kushtetuese në Bosnjë. E gjithë kjo do të mbikëqyret nga Maureen Cormack, ish -ambasadorja amerikane në Bosnjë, e cila tani është zëvendës ndihmëse sekretare e shtetit për Evropën dhe Euroazinë.
Të gjithë, së bashku me Sekretarin e Shtetit Tony Blinken, e dinë mirë situatën në Ballkan dhe asnjëri prej tyre nuk do të ngurrojë të vendosë sanksione ndaj politikanëve vendas në të ardhmen e afërt të cilët nuk bashkëpunojnë me Bashkimin Evropian dhe Shtetet e Bashkuara. /tesheshi.com/
