Të gjithë ish-të dënuarit politikë që janë gjallë do të marrin të gjitha këstet e dëmshpërblimit brenda vitit 2017. Ka qenë kjo deklarata e ministrit të Mirëqënies Sociale, Blendi Klosi, gjatë mbledhjes së komisionit të çështjeve sociale.
“Me pak buxhet më shumë se viti i kaluar do të realizohet mbështetja për ish-të përndjekurit, duke përmbushur me domosdo brenda mandatit qeveritar likuidimin e 8 kësteve për të përndjekurit e gjallë nga regjimi i kaluar”, u shpreh Klosi.
Ministri tha se buxheti i institucionit që ai drejton do të jetë 146.39 miliardë lekë, përgjatë gjithë vitit 2017. Sipas tij, kategoria e personave me aftësi të kufizuara, që janë mbi 164 mijë do të kenë një fond të rëndësishëm nga buxheti i shtetit.
Duke u ndalur në këtë pikë, deputeti i Lëvizjes Socialiste për Integrim, Petrit Vasili tha se kjo çeshje kërkon më shumë vëmendje, për të shmangur rastet e abuzimeve, teksa ai i’u referua viteve të shkuara.
“Po të bëni një analizë të detajuar të dhjetra apeleve dhe kërkesave që vijnë për analiza në Tiranë do të vëreni se ka raste abuzive, me monstruozitete profesionale e shoqërore. Kjo, sepse ministria ka 2 plane: edhe atë medikal, edhe atë social”, u shpreh Vasili.
Ky fakt u pranua edhe nga ministri Klosi, duke thënë se: “Mënyra e vlerësimit është e gabuar. Mënyra sesi tek i njëjti mjek merret fleta e paaftësisë, apo dëshmia për person me aftësi të kufizuar ka bërë që sistemi realisht të ketë njolla të zeza dhe vlerësimi të jetë me probleme”, pohoi ministri i Mirëqënies Sociale./tesheshi.com
