Po qëndrojnë të gjithë gati për ankand: me “qese” hapur, me stilolaps të shtypur, me “zero” të gatshme të shtohen, me fanellë me emrin sipër. E nuk janë klube dosido, por Barcelona, Bajern i Mynihut, Liverpul, Arsenal, Juventus dhe Inter.
Të gjithë duan Leon Goretzkën, mesfushorin gjerman që po zhvillon një sezon mbreslënës me Shalke 04. Lojtari që tashmë është pjesë e rregullt e grumbullimeve të Kombëtares së Gjermanisë, përfundon kontratën dhe me shumë gjasa, do të largohet nga shokët aktualë të skuadrës.
Bajerni i Mynihut i ka “ngulur kthetrat” tek-22 vjecari dhe ka nisur që këtë verë bisedimet me Shalken.
Barcelona gjithashtu kërkon një lojtar të fortë dhe të ri, në mesin e fushës, e këto tipare i gjen tek Goretzka.
Arsenali ka qenë ndër klubet që bëri ofertë në verë, por nuk e arriti dot mesfushorin gjerman. Po ashtu Jurgen Klop e sheh ideal 22-vjecarin për mesfushën e Liverpul.
E në fund, italianët e Juventusit dhe Interit janë gati t’i besojnë “luanit” gjerman, “çelësat” e mesfushës. Të gjithë janë në pritje, e të gjithë kërkojnë qoftë dhe një shenjë nga lojtari, për t’u hedhur në sulm.
Por varet shumë dhe nga vetë Leon Goretzka, i cili pavarësisht moshës së re, ka zhvilluar 120 ndeshje zyrtare në total, duke përfshirë Budesligën, Ligën Europiane e ndeshjet me Kombëtaren. /tesheshi.com/
