Austria është njëri ndër pesë investitorët më të mëdhenj në Kosovë. Kështu u tha sot në hapjen e Forumit ekonomik kosovaro-austriak ku morën pjesë përfaqësues nga Oda Ekonomike e Austrisë dhe Kosovës.
Me këtë rast u theksua dhe rritja e investimeve që ky shtet do të bëjë në Kosovës.
Peter Hasslacher nga Oda Ekonomike Federale e Austrisë ka thënë se Austria është ndër pesë investitorët më të mëdhenj në Kosovë dhe se është në rrugë të mirë të zhvillimit ekonomik të saj.
“Kemi rritje të shkëmbimeve tregtare me Austrinë prej 188 milionë në 220 milionë euro. Gjithashtu kemi pasur edhe investime direkte që është një lajm i mirë. Kosova është në një rruge të mirë të zhvillimit ekonomik të saj”, tha Hasslache, raporton “KosovaPress”.
Kryetari i Odës Ekonomike të Kosovës, Safet Gërxhaliu ka treguar se gjithmonë do të përkrahen bizneset austriake në Kosovë dhe se është shumë i lumtur për partneritetin që e ka me këtë vend.
“Ne si Odë ekonomike jemi partner po provojmë që t’i përkrahim bizneset austriake në Kosovë. Duke i parë investimet austriake në vendet e rajonit, ku ka miliarda investime e kemi parë që ka hapësirë për të investuar edhe tek ne”, tha Gërxhaliu.
Sipas tij për këtë duhet të gjinden metoda të reja për të rritur këtë bashkëpunim dhe se Kosova duhet të punojë më shumë në ndryshimin e imazhit të saj. /tesheshi.com/
