1 Gushti shënon zyrtarisht pikun e sezonit të pushimeve, kur zakonisht njerëzit lënë shtëpitë për të udhëtuar drejt detit, në vendlindje apo në destinacione të tjera të dëshiruara. Pikërisht për këtë arsye, por nuk mungojnë edhe ato burokratike, dita e sotme ka shënuar radhë të gjata në pikëkalimet kufitare e në portin e Durrësit.
Radhë janë raportuar prej disa ditësh në pikëkalimin e Muriqanit mes Shqipërisë e Malit të Zi, por sot janë shtuar radhët edhe në pikëkalimet mes Shqipërisë dhe Kosovës. Vargu i makinave, si raportojnë dëshmitarët, është i gjatë edhe në pikekalimet kufitare me Serbinë, në Merdare dhe Dheu i Bardhë ku vargu i makinave shkoi deri në 3-4 kilometra.
Fluksi i madh i pasagjerëve në portin e Durrësit ka bërë që qytetarët të mos kalojnë lirisht, por të presin për të bërë kontrollin. Raportohet për më shumë se 4700 qytetarë që mbërritën në Durrës.
Ndërkaq, shqiptarët kanë pasur probleme me udhëtimin edhe në Europë. Kriza e emigrantëve në kanalin që lidh Britaninë me Francën ka sjellë vonesa, që raportohet se kanë detyruar edhe shumë qytetarë shqiptarë që lëvizin për pushime, të ndryshojnë itinerarin. /te sheshi.com/
