Do të kalojë shumë kohë para se rreziku i koronavirusit të ri të zvogëlohet, tha një zyrtar i lartë i Organizatës Botërore të Shëndetit të mërkurën, duke paralajmëruar se zbulimi i vaksinës nuk garanton fitoren ndaj Covid-19.
OBSH shpalli një gjendje globale të jashtëzakonshme në fund të janarit dhe nuk ka indikacione se mund ta heqë atë, tha Mike Ryan në një konferencë virtuale në Gjenevë.
“Do të kalojë një kohë e gjatë para se të fikim alarmin,” theksoi ai.
Vendet ku është duke u ulur epidemia duhet të jenë të kujdesshme dhe të ndërmarrin hapa për të parandaluar një valë të re, tha ai, duke përmendur Korenë e Jugut, Kinën dhe Gjermaninë si shembuj pozitivë.
Zyrtari i OBSH-së ka paralajmëruar se koronavirusi i ri ka më shumë të ngjarë të qarkullojë në një farë mase në vend që të zhduket krejt.
“Ky virus nuk mund të ikë kurrë,” theksoi Ryan.
Pasi të zhvillohet një vaksinë, ajo duhet të jetë e disponueshme për të gjithë botën me çmime të përballueshme dhe njerëzit duhet ta marrin atë vullnetarisht, beson ai.
“Kemi disa vaksina perfekte të efektshme që nuk përdoren në mënyrë efektive,” tha Ryan, duke cituar shembullin e fruthit.
Sidoqoftë, ai theksoi se disa sëmundje, siç është HIV, mund të mbahen nën kontroll pa vaksina.
“Ne kemi gjetur terapi dhe masa parandaluese, kështu që njerëzit nuk janë aq të frikësuar sa dikur,” tha Ryan për HIV. /tesheshi.com/
