Ministria e Jashtme greke ka bërë të ditur zyrtarisht anulimin e vizitës së shefit të diplomacisë, Nikos Kotzias, në Tiranë.
Faqja zyrtare e MPJ greke bën të ditur se nga data 24 deri më 26 qershor Kotzias do të vizitojë Ballkanin Perëndimor, përkatësisht më 24 do të jetë në Maqedoni dhe më 26 qershor në Serbi dhe Mal të Zi.
Në këtë listë nuk figuron Shqipëria, për të cilën vetë ministri kishte deklaruar se do ta vizitonte gjatë një pritje me gazetarët në fillim të muajit.
Ministri i Jashtëm grek, i është përgjigjur pyetjes së gazetarit shqiptar Robert Goro, kryeredaktorit të gazetës Tribuna që botohet në Athinë, se do të vizitojë Tiranë gjatë një turi që do të zhvillojë në Ballkan.
“Që me marrjen e detyrës, më janë bërë dy ftesa, një nga Beogradi dhe një nga Tirana. Nuk doja të realizoja vizita të shkëputura, të cilat do të mund të kishin interpretime të ndryshme. Prandaj vendosa të përfshij gjithë vendet ballkanike në një tur të vetëm”,-ka sqaruar Kotzias vizitën në vendin tonë për të cilën sqaron se: “Ende nuk janë fiksuar datat e vizitave dhe për këtë po punohet me ministritë homologe”, shtoi Kotzias.
Por tashmë është bërë e qartë se vizita është anuluar sidomos pas rritjes së tensioneve mes dy qeverive kohët e fundit. Në një deklaratë të zëdhënësit të Ministrisë së Jashtme greke, Kryeministri shqiptar Edi Rama është cilësuar i “papërgjegjshëm”. Tensionet kanë pasur si shkas ndalesën që Tirana i bëri Athinës pas tentativës për të kërkuar naftë në zonat e detit Jon brenda pjesës shqiptare. Por tensioned u rritën shumë pas vizitës së Presidentit turk Reçep Tayyp Erdogan në Tiranë.
Shefi i diplomacisë greke, Nikols Kotzias të mërkurën do të takohet me kryeministrin e Maqedonisë, ku në qendër të vëmendjes do të jetë çështja e emrit dhe marrëdhëniet dypalëshe.
Kotzias në takimin e fundit me zv.kryeministrin për evrointegrime Fatmir Besimi ka theksuar se në takimin në Shkup do të mbyllë marrëveshjen për ndërtimin e masave të mirëbesimit midis dy vendeve si dhe thellimin e bashkëpunimit në fusha të ndryshme. /tesheshi.com/
