Taulant Balla shpall mbylljen e komisionit hetimor parlamentar për aferën CEZ. Në fund të punës së tij, komisioni ka arritur në përfundimin se me privatizimin e CEZ u shkel ligji dhe shkaktua një dëm prej 4 milionë euro.
Ndërkaq, Komisioni i CEZ ka paditur në prokurori ish-kryeministrin Sali Berisha, ish-ministrat Genc Ruli e Ridvan Bode, Nue Kalajn, Shkëlzen Berishën, por edhe disa zyrtarë të lartë të kohës. Duke folur në Kuvend, Balla tha se në kushtet e sotme komisionet hetimore janë shumë të nevojshme, pasi çështjet nuk hetohen nga Prokuroria.
Shqetësimi për të cilin është ngritur Komisioni ka qenë i justifikuar dhe Prokuroria nuk ka përfshirë fajtorët e vërtetë.
Ky komision nxori në pah shumë mangësi për administrimin e dëshmive. “Ne patëm dëshmitarë që iu shmangën detyrimit për të treguar të vërtetën, duke sharë e fyer. Bojkoti i opozitës në Parlament nisi menjëherë pas dëshmisë së Shkëlzen Berishës. Ndoshta kjo është rastësi, por unë mendoj se hetimet e komisionit hetimor kanë qenë shkak për tu futur në çadër. Është provuar përtej çdo dyshimi se privatizimi i CEZ nisi në fundin e vitit 2005 dhe fillimin e vitit 2006. Kemi një email të Nue Kalajt në drejtim të Martin Roman ku thuhet se Nue Kalaj ka kontribuar 4 vjet në negociata”, tha Balla.
Kulmi i kësaj afere është transferta prej 6 milionë eurove përpara se qeveria shqiptare të miratonte ligjin për privatizimin e OSSH-së. Shuma e përfituar në total nga Kalaj si sekser është mbi 7 milionë euro.
Taulant Balla deklaroi se Komisioni dyshon se kreu i DIA, Kastriot Ismailaj ka udhëtuar me Shkëlzen Berishën në Pragë dhe së bashku janë akomoduar në hotel Mandarin në Pragë.
Kompanitë e Ujësjellës Kanalizimeve që i kishin borxhe CEZ morën para nga qeveria që të paguanin borxhet dhe në këtë mënyrë të paguhej me 30% edhe kompania DIA. Një transaksion i vetëm në këtë rast është shuma prej 570 milionë lekë të reja, për Ujësjellës Kanalizime që të paguante borxhet e CEZ ku 30% i kaloi DIA-s.
Balla kërkoi që Kuvendi të miratojë raportin dhe ta dërgojmë tek prokurori i Përgjithshëm në ngarkim të: Sali Berisha për shpërdorim detyre, shkelja e barazisë në tendera, refuzimi për të dëshmuar, Nue Nik Kalaj për akuzën pastrim parash, refuzim për të dëshmuar etj, Genc Ruli, ministër i Ekonomisë dhe Energjitikës, Ridvan Bode, Ministër i Financave, anëtarët e komisionit të Ofertave, anëtarët e negociimit me CEZ, Shkëlzen Berisha, Bujar Nepravishta, Sokol Ramadani. /tesheshi.com/
