Është konfirmuar tashmë se ish-kryeminstri Maqedonas Nikolla Gruevski, ka shfytëzuar territorin shqiptar për t’u “arratisur” drejt Hungarisë, ku në përpjekje për t’i shpëtuar burgut ka kërkuar azil politik.
Ishte media serbe ajo që dha lajmin se Gruevski ka kaluar nga Shqipëria, e orë më vonë, policia shqiptare konfirmon se kjo ka ndodhur katër ditë më parë.
“Departamenti i Kufirit dhe Migracionit në Policinë e Shtetit duke iu përgjigjur interesimit të medias në lidhje me hyrjen dhe daljen nga territori i Republikës së Shqipërisë të shtetasit Nikola Gruevski, ju informon se:
Shtetasi Nikola Gruevski më datë 11.11.2018, rreth orës ora 19:11, ka dalë nga territori i Republikës së Shqipërisë nëpërmjet pikës së kalimit kufitar të Hanit të Hotit në drejtim të Malit të Zi, si pasagjer në automjetin me targë CD1013A, në pronësi të Ambasadës Hungareze në Tiranë.
Në datën 11.11.2018 për shtetasin Nikola Gruevski nuk ka patur asnjë njoftim në kufi apo shpallje si person në kërkim.
Interpol Shkupi në datë 13.11.2018, rreth orës 19.35 i ka dërguar Interpol Tiranës njoftimin për shpallje në kërkim ndërkombëtar për këtë shtetas”, thuhet në njoftimin zyrtar të Policisë së Shtetit.
Gruevski është futur në Shqipëri nga pika kufitare e Bllatës në Dibër, duke udhëtuar më pas drejt Tiranës. Aty është marrë nga ambasada hungareze, për t’u shoqëruar më pas drejt Malit të Zi, deri në Budapest. Pra, siç mund të kuptohet, ka qenë aleati i tij politik Viktor Orban,që është kujdesur për gjithçka.
Gruevski është dënuar me 2 vjet burg për aferën “Tanku”, ndërkohë që po hetohet dhe për të tjera dosje t ëish-pushtetit të tij. Ai qeverisë Maqedoninë për gati 10 vjet, duke arritur në zenithin e pushtetit, por që në një moment, edhe si një investim ndërkombëtar, pushteti i tij u shkërmoq. /tesheshi.com/
