Një zyrtar i lartë shqiptar, i propozuar nga Lëvizja Socialiste për Integrim, Selim Belortaja, ka lëshuar bombën sot në një komision të Kuvendit.
Selim Belortaja, një nga ekspertët më të mirë të vendit dhe që në ministrinë e Jashtme mbulon marrëdhëniet ekonomike, ka deklaruar sot se njerëzit po ikin nga reformat e forta të qeverisë aktuale.
Gjatë një seance dëgjimore në Komisionin e Jashtëm të Parlamentit, Belortaja përmendi dy gjëra, E para “Përqindja e azilkërkuesve, në krahasim me fluksin është dyfishuar në vitin 2015, krahasuar me 2014”. Dhe e dyta ishte analiza për këtë eksod.
“Në vështrimin tim gjithmonë, këtu nuk dua të ngarkoj Ministrinë, që edhe reformat e forta e të guximshme që po ndërmerr qeveria shqiptare, patjetër prodhojnë kosto. Kush mendon që ato nuk prodhojnë kosto afatshkurtër, nuk mendoj se i afrohen të vërtetës. Ato prodhojnë kosto afatshkurtër për hir të stabilitetit dhe krijimit të një situate afatgjatë”, tha Belortaja.
Në fakt, duket sikur po shtohen ditë pas kritikat dhe thumbat e eksponentëve të LSI-së ndaj politikave të qeverisë. Vetë Ilir Meta, ditën e festës së kombëtares deklaroi se “duhet ta kemi mëndjen te përmbytjet”. Ndërkohë eksponentë të tjerë si Vasili, Manjani e të tjerë kanë sulmuar hapur mazhorancën dhe qeverinë për politika të caktuara si për shëndetësinë dhe marrëveshjen me CEZ.
E gjithë kjo situatë ndodh në një aureolë përplasje mes Edi Ramës dhe Ilir Metës, i cili i ka kërkuar largimin e tre ministrave në qeveri, por Kryeministrin nuk e pranon.
/tesheshi.com/
