“Shteti i Maqedonisë është peng i kryeministrit Gruevski, i cili për të mbrojtur veten, mban peng gjithë shtetin” – Kështu ka deklaruar në intervistë për Dojçe Velle (Deutsche Welle) lideri i LSDM-së, Zoran Zaev, i cili me javë të tëra po shpalos përgjime telefonike për përfshirjen e ekzekutivit në afera koruptive, dhe shkelje tjera të ligjit, por deri më tani pa ndonjë efekt të madh.
I pyetur të komentojë se cilat materiale mund ta mbushin kupën dhe të thuhet mjaft më, Zaev ka thënë se janë mbi 90 pako materiale të cilat i posedon, me informacione shokuese:
“Qytetarët do të dinë se deri ku ka shkuar Gruevski me çështjen e emrit, çka ka ndodhur me Martin Neshkovskin,(të vrarë nga policia në rrethana misterioze) për krimet financiare, çka ka ndodhur me rastin e mbylljes së televizionit A1 dhe me raste tjera siç është rasti ‘Monstra’, me Nikolla Mlladenov (gazetarin që humbi jetën në aksident trafiku)”-ka thënë Zaev, sipas të cilit revolta tek popullata është shumë e madhe, ndërsa ka prognozuar se në çdo moment turma të mëdha qytetarësh mund të dalin në rrugë, në shenjë revolte.
“Nga ajo që kam si fakte, kam dëgjuar te materialet e përgjimeve se deri ku mund të shkojë një mendje monstruoze” ka thënë ai. /tesheshi.com/
