Një zjarr i madh ka përfshirë Fort McMurray në Alberta Kanada, duke shkatërruar një lagje të tërë dhe duke i detyruar 80.000 banorë të ikin. Zjarri ka djegur shtëpitë dhe bizneset ndërsa ka dalë jashtë kontrollit, raporton CBC Canada.
Shefi i autoritetit zjarrfikës, Darby Allen tha se më e keqja nuk ka ndodhur ende, ndërsa shtoi se nuk dihet se çfarë mund të ndodhë gjatë natës.
Rreth gjysma e të gjitha tokave në periferi të Abasands janë përfshirë nga zjarri, sipas raportimeve të mediave lokale. Banesa të tëra janë shkatërruar, por pavarësisht situatës së rënduar, deri më tani nuk ka raportime për persona që kanë humbur jetën apo janë plagosur rëndë.
Autoritetet në Alberta kanë kërkuar ndihmë nga provinca të tjera dhe nga Ottawa për të shuar zjarrin dhe për të siguruar jetët e njerëzve. Deri më tani autoritetet kanë mundur të evakuojnë shëndoshë e mirë rreth 80 mijë banorë.
Situata ende nuk është nën kontrollin e autoriteteve përkatëse, ndërsa nuk dihen shkaqet e këtij zjarri që po shkrumbon një qytet të tërë. /tesheshi.com/
