Vatrat e zjarrit përgjatë dy muajve të fundit janë kthyer në një shqetësim serioz, ndërsa herë pas here është dhënë alarmi për cënim të sigurisë kombëtare.
Dyshimet e shprehura publikisht nga të paktën dy ministra janë se zjarrëvëniet në shumicën e rasteve janë të qëllimshme, pavarësisht se numri i personave të arrestuar për këto ngjarje është minimal.
Çdo ditë emergjencat civile raportojnë se në rang vendi përgjatë 24 orëve evidentohen minimalisht 10 vatra zjarri, ndërsa ende nuk ka një përllogaritje mbi sipërfaqet që rezultojnë të djegura apo dëmtuara, dëmet e shkaktuara etj.
E gjithë kjo situatë duket se ka vënë në lëvizje Prokurorinë shqiptare, e cila po heton mbi pistën e zjarrëvënieve të qëllimshme. Burime nga organi i akuzës bëjnë të ditur për tesheshi.com se po përpunohen informacionet e mbledhura nga agjensitë ligjzbatuese në lidhje me gjithçka që ka ndodhur dhe po ndodh, ndërsa hetimi do të jetë i thelluar.
Objekt i hetimit, sipas burimeve të prokurorisë, do të jetë edhe përfitimi apo abuzimi me fondet publike dhe dëmtimi i pasurive natyrore.
Hetimet e deritanishme kanë nxjerrë në dritë se në rreth 75 % të zjarreve ato kanë qenë larg zonave të banuara, çka e bën edhe më të vështirë zbulimin e autorëve për zjarrëvënie të qëllimshme.
Por sipas burimeve, prokurorët po kalojnë në sitë veprimet dhe vendimmarrjet e kryebashkiakëve, veçanërisht përsa i takon përdorimit të fondeve për ngritjen e stacioneve zjarrfikëse dhe mbrojtjen e pyjeve dhe sipërfaqeve që kanë në territorin e bashkisë që drejtojnë.
Nga konstatimet e deritanishme rezulton se në 23-25 njësi vendore këto stacione nuk ekzistojnë, çka sipas prokurorëve mund të përbëjë konsumimin e veprës penale të shpërdorimit të detyrës.
Burimet nga prokuroria konfirmojnë se në këtë pikë grupet e prokurorëve po kërkojnë informacione të detajuara sepse stacionet zjarrfikëse nuk janë vënë në veprim, përderisa fondet e përcaktuara për këtë qëllim janë lëvruar.
Hetimi, nëse i shkohet deri në fund, mund të sjellë pasoja penale për kryebashkiakët të cilët kanë devijuar apo shpërdoruar fondet. Kjo do të thotë se ky proçes i nisur për zjarrëvëniet e qëllimshme mund të çojë në zbulimin e një skandali me përmasa të mëdha ku me drejtësinë mund të përballen për herë të parë rreth 30 % e kryetarëve të njësive vendore të të gjithë vendit.
Burimet theksojnë se në dispozicion të prokurorëve janë edhe informacionet e mbledhura nga agjensitë ligjzbatuese, madje edhe një raport konfidencial ku analizohen rast pas rasti të gjitha rastet e zjarrëvënieve, masat që duhej të ishin marrë nga pushteti vendor, veprimtaria e administratës përgjegjëse dhe deri te reagimi për shuarjen e vatrave.
Tesheshi.com ka mësuar se raporti është hartuar mbi informacione të mbledhura në rrugë operative, dëshmi dhe analizat e kryera nga agjensitë ligjzbatuese, të cilat janë vënë në lëvizje dy javët e fundit, kur edhe përmasat e zjarrvënieve janë rritur së tepërmi.
Nga përllogaritjet e deritanishme mësohet se operacionet për shuarjen e zjarreve i kanë kushtuar buxhetit të shtetit rreth 300 milionë lekë, ndërsa në ndihmë të ekipeve zjarrfikëse në vend, i kanë ardhur edhe avionë dhe helikopterë të posaçëm nga Greqia dhe Italia. /tesheshi.com/
