Policia e Shtetit vendosi të ndëshkojë me gjobë COVID lokalin dhe pjesëmarrësit në një zijafet ditëlindjeje, organizuar nga aktori i humorit Bes Kallaku në Laknas të Kamzës.
Qe aty, çakërqejf, edhe çifti Meta-Kryemadhi, ku të gjithë, edhe ata, sfiduan hapur aktin normativ anti-COVID, duke mos respektuar asnjë masë.
Polica thotë në njoftim se “në lidhje me aktivitetin e zhvilluar më datë 20.11.2020 në një lokal në fshatin Laknas, Bashkia Kamëz, ku shtetasi B.K, kishte organizuar një ceremoni ditëlindje dhe kishte ftuar rreth 30 persona, Drejtoria Vendore e Policisë Tiranë menjëherë mori masa në zbatim të Aktit Normativ, për parandalimin e përhapjes së COVID-19.
Nga ana e Policisë së Tiranës, u mor masa administrative 1.000.000 lekë për administratorin e lokalit shtetasin F.U., në bazë të aktit normativ nr 3 datë 15.03.2020. Gjithashtu në bazë të pamjeve filmike janë identifikuar të gjithë personat që ishin pjesmarrës në aktivitetin e zhvilluar dhe do ndëshkohen me masë administrative për shkelje të masave kufizuese anticovid-19.
Njëkohësisht Drejtori i DVP Tiranë ka pezulluar nga detyra 6 punonjës Policie për moskryerje të kontrollit të territorit dhe ndaj tyre Drejtoria e Standarteve Profesionale në Drejtorinë e Përgjithshme të Policisë së Shtetit ka nisur ecurinë disiplinore për shkelje të rëndë.
Drejtoria Vendore e Polcisë Tiranë apelon për të gjithë administratorët e lokaleve dhe qytetarët që të respektojnë me korrektësi masat anticovid duke bërë të mundur shkëputjen e zinxhirit të infektimit nga virusi dhe fton qyetarët që të denoncojnë në 112 e Komisariatin Dixhital cilindo administrator lokali apo qytetar që nuk i respekton këto masa kufizuese duke u kthyer në burim rreziku për shëndetin e qytetarëve”.
Kujtojmë se për znj.Kryemadhi kjo do jetë gjoba e tretë COVID, pasi deri dje ajo nuk pranonte të mbante maskë, pasi e konsideronte pandeminë një komplot botëror.
Ndërsa bashkëshorti i saj, president republike, vetëm së fundi vendosi të mbajë maskë në publik, e kjo do jetë gjoba e parë për të për shkelje të masave COVID. /tesheshi.com/
