Lëvizja për Reforma në PDSH , synon bashkimin e opozitës shqiptare në Maqedoni, por pa Menduh Thaçin. Kjo do të bëhet pas konsolidimit të radhëve të ‘Lëvizjes’, e cila synon vulën partiake. Këto janë qëndrimet më të fundit të kryesuesit të ‘Lëvizjes’, Zijadin Sela, që nuk shfaqet i brengosur dhe as i befasuar nga paralajmërimet për bashkëpunim të mundshëm mes Ali Ahmetit dhe Menduh Thaçit, pasi sipas tij, këta dy janë gjithmonë bashkë kur rrezikohen nga pala e tretë, të cilën e luftojnë me çdo kusht.
“Me kryesinë që do të zgjidhet, do të krijojmë një opozitë të bashkuar dhe të fortë, e cila do ta marrë legjitimitetin nga ata të cilët e kanë keqpërdorur 13 vite, ashtu siç e keqpërdorën edhe gjakun dhe paratë e shqiptarëve, që është BDI-ja; dhe do ta shfrytëzojmë këtë legjitimitet për të mirën e atyre që do të na e japin dhe ky është populli i cili do të na votojë”, deklaroi Ziadin Sela, kryetar i ‘Lëvizjes për Reforma’ – PDSH.
Kuvendi Qendror i Lëvizjes për Reforma, në mbledhjen e parë në Shkup, zgjodhi Arben Taravarin për Sekretar të Përgjithshëm të Lëvizjes. Ai theksoi se pavarësisht rrjedhës së procesit gjyqësor për vulën zyrtare të PDSH-së, legjitimitetin e PDSH-së së vërtetë sipas tij e mban ‘Lëvizja’ e Selës. /tesheshi.com/
