Pas Institutit Demokratik të Kosovës (KDI), edhe shefja e Zyrës së BE-së, Nataliya Apostolova ka shprehur zhgënjimin e saj me mosmbajtjen e asnjë seance plenare të Kuvendit të Kosovës që nga konstituimi i tij.
Apostolova ka thënë se këtë zhgënjim të sajin do t’ia shprehë edhe kryeparlamentarit, Kadri Veseli, sapo t´a takojë.
Ajo ka deklaruar se arsyetimi i Kuvendit se grupet parlamentare ende nuk i kanë propozuar deputetët anëtarë të komisioneve, kryetarët dhe zëvendëskryetarët nuk e ka bindur shumë.
“Deri më tani grupet parlamentare është dashur që ta mbyllin këtë çështje dhe Kuvendi të fillojë punën. Kosova nuk ka kohë për të humbur, sidomos në fushën e integrimeve evropiane, e që në këtë fushë sipas saj rol krucial ka vetë Kuvendi i Kosovës”, tha Apostolova, në një panel të organizuar nga Grupi për Studime Politike dhe Juridike ku është diskutuar rreth zbatimit të Marrëveshjes së Stabilizim Asociimit dhe impaktit të saj në Kosovë. /tesheshi.com/
