Që zgjedhjet e 25 qershorit kanë prodhuar një ndryshim radikal në retorikën politike shqiptare kjo pritej dhe ishte parashikuar përgjithësisht: që ose Rama do të festonte dhe të tjerët: Basha, Berisha, Meta do të qëndronin anash, ose e kundërta Rama do të fundosej përfundimisht nëse nuk do të merrte 71 mandatet për të qeverisur.
Por një fakt apo fenomen realisht nuk u parashikua dhe për çudi, nuk po analizohet fare, po fare fare.
Zhdukja thuajse totale në një hapësirë apo qosh të paditur të politikanit apo oratorit nga më të zotët në vend, Ben Blushit.
Shkrimtari, gazetari dhe politikani prej më shumë se 20 vitesh, pas rezultatit zhgënjyes për të në zgjedhjet e 25 qershorit të LIBRA-s ka humbur dhe po mungon dramatikisht në mexhlisin shqiptar të opinionit publik.
Mungesa e gjatë e Blushit ka krijuar një boshllëk të rëndësishëm, një çudi, por nga ana tjetër edhe një pashpjeshgueshmëri nga ata që e kanë dëgjuar, pëlqenin ta dëgjonin, apo e kanë ndjekur.
Ben Blushi nuk i përket thjesht vetes, edhe pse është një njeri i lirë, por është pjesë e vyer e opinionit publik.
Ndoshta është e drejta e tij të tërhiqet, po dreqi e mori, duhet të japë një shpjegim. Ai gjithë këto vite ka hapur beteja, ka ngjizur ide, ka udhëhequr debate, ka gëzuar edhe mërzitur të tjerët, ka qenë edhe kontraversal, por në krye të herës është një zë qytetar dhe gjenuin i shoqërisë shqiptare.
Në radhët e mbështetësve të LIBRA-s, që i takon pranë selisë së partisë që Ben Blushi shpalli që e ka pasionin e tij të ri, një pasion që do të vinte e t’i shtohej dita-ditës, kur i pyet për kryetarin, për mungesën e tij, sikur janë solidar me zhdukjen pa adresë të Benit.
“Mirë ka bërë, me këtë popull që deshi të gjatin!”, shprehet një nga ndjekësit më pasionant të LIBRA-s, i cili edhe pas insistimit për largimin e pashpjegueshëm të Ben Blushit nga opinion publik, vazhdon të mallkojë shqiptarët që e votuan aq pak.
Më 20 korrik është statusi i fundit fundit i Ben Blushit në faqen zyrtare të facebook-ut.
Sa për ta kujtuar:
MASAKRA MBI LIBRA. 71 KUTI MINUS 90 VOTA
KQZ pranoi se te pakten 76 numerues kane vjedhur vota ne Tirane ne vetem 64 kuti. Tirana ka 1198 kuti dhe kaq duhet te mjaftonte qe gjithe qarku i Tiranes te rinumerohej.Ne 64 kuti qe rinumeroi KQZ mungojne 50 vota per LIBRA , ndersa ne 7 kuti te tjera qe u bene publike mungonin 40 vota. Kjo do te thote se vetem ne 71 kuti ne Tirane, LIBRA i kane vjedhur 90 vota. Mjafton vetem kaq qe KQZ ta rinumeroje gjithe Tiranen. KQZ do ishte bashkepuntore ne grabitje nese nuk vendos te ndryshoje rezultatet duke rihapur te gjitha kutite. Edhe me kaq sa eshte njoftuar del se LIBRA eshte partia me e grabitur ne keto zgjedhje çka eshte per turpin e atyre qe e kane bere.
Ka shumë gjasa që akuza e Ben Blushit të ketë bazë, por përse ai nuk e vazhdoi betejën në KQZ, në Kolegjin Zgjedhor, gjykata apo tek misioni vëzhgues i OSBE-ODIHR-it?
Përse nuk gëloi në media apo në rrjetet sociale?! Janë pyetje që vijnë natyrshëm ndaj një personi që prej 6 janarit 1991 kur doli gazeta e parë opozitare “RD” ka qenë prezent në opinionin publik çdo ditë për 25 vjet.
Ndaj dhe duket kaq e pakuptueshme dhe e pashpjegueshme ky asketizëm i kryetarit të LIBRA-s, i cili gjithashtu është edhe shkrimtar dhe politikan.
Si një kryetar partie, ai e kishte detyrim që të shpjegonte të paktën para atyre që i besuan se ç’ndodhi dhe cili është projekti i tij për sot dhe për nesër. Kjo është mëse normale… /tesheshi.com/
