Partia “Zgjidhja”, e drejtuar nga Koço Kokëdhima, përmes një deklarate ka reaguar mbi raportin e ministrave teknik për zgjedhjet, ndërsa shprehet se “ne kemi kohë që e paralajmërojmë, vendi është në rrezik dhe i kapur nga një klan qeverisës i kriminalizuar”. Gjithashtu, Zgjidhja ka komentuar edhe deklaratat e bëra nga kreu i PD-së, Lulzim Basha, sipas të cilit zgjedhjet u dhunuan dhe manipuluan nga Edi Rama dhe makineria e tij e pushtetit e ndihmuar nga krimi i organizuar dhe paratë e drogës dhe të korrupsionit”.
“PD-ja dhe Basha bashkëpunuan me Ramën dhe Rilindjen për të realizuar dhe legjitimuar zgjedhjet e 25 Qershorit ku “makineria e pushtetit” së bashku me krimin e organizuar vunë në “punë” miliardat e drogës dhe korrupsionit. Pas zgjedhjeve PD-ja heshti.
Tani që, me sa duket, është prishur pazari i 18 majit, Basha bërtet për një gjë që ne e paralajmëruam dhe denoncuam përpara, gjatë dhe pas zgjedhjeve në fjalë. Vendi është në rrezik! Ai është kapur nga një klan qeverisës i kriminalizuar, mafioz dhe i korruptuar deri në palcë.
“Opozita zyrtare” është e paaftë, por edhe pjesë integrale e kësaj elite të kalbur politike që për më shumë se dy dekada, e ka rreshtuar Shqipërinë mes vendeve më të varfra dhe më të korruptuara të botës, më keq se shumica dërmuese e vendeve afrikane të botës së tretë”, thuhet në deklaratën e partisë Zgjidhja. /tesheshi.com/
