Ndër kandidatët për deputetë në kuadër të zgjedhjeve të 11 dhjetorit në Maqedoni është dhe Nexhmedin Sadiku, një personalitet i arsimit nga Kumanova. Ai është bartës i listës në njësinë zgjedhore numër 2 nga Aleanca për Shqiptarët. Profesor Sadiku shprehet i bindur se këto zgjedhje do e ndryshojnë fatin e deritanishëm të përfaqësimit shqiptar në parlamenti e më tutje. Sipas tij, partia e Ali Ahmetit, e cila prej vitesh është në qeverisje duke mbështetur VMRO-në e Gruevksit, nuk do mund ta gëzojë më atë pas 11 dhjetorit…
Intervistoi: Mensur Krasniqi
Me sa jemi të njoftuar, ju në garën tuaj për deputet në njësinë zgjedhore numër dy, hyni me një profesion fisnik të mësimdhënësit. Si ndodhi që të kandidoni për deputetë?
Kandidimi im për deputet erdhi si rezultat i shumë rrethanave. Së pari, bashkimi i tri partive: LRPDSH, Uniteti dhe RDK, duke krijuar Aleancën për Shqiptarët, një bashkim i forcave opozitare që populli e donte me kohë. Planin dhe platformën e Aleancës për Shqiptarët, i shoh si pikënisje e zgjedhjeve të problemeve të akomuluara gjatë këtyre viteve si dhe besimi në vizionin dhe urtësinë e liderëve të Aleancës, prandaj propozimit të Aleancës për të garuar nën petkun e saj për bartës liste në njësinë nr.2 e kisha vështirë ta refuzoj, duke ditur se ndryshimi në shoqëri vjen vetëm atëherë kur të gjithë do të bashkohemi rreth një qëllimi e ideali. Profesioni im si profesor më dha shtytje plotësuese sepse dua ta ndryshoj sistemin arsimor dhe gjendjen e arsimit në mënyrë të posaçme.
Dhe duke pasur parasysh fushatën elektorale para zgjedhjeve në terren, cilat janë gjasat që të siguroni mandatin e deputetit?
Programi dhe platforma e Aleancës për Shqiptarët po pritet gjithnjë e më shumë tek elektorati shqiptar, i cili është lodhur nga premtimet boshe si dhe politikat e deritanishme të ish partnerëve qeverisës. Aleanca për Shqiptarët, qëndron shumë fort në teren dhe po ju them me plotë bindje, se fitues të ketyre zgjedhjeve do të jetë Aleanca për Shqiptarët.
Cila është platforma e Aleancës, dhe në çfarë forme mendoni ta realizoni nëse arrini ta fitoni legjitimitetin e popullit?
Platforma e Aleancës për Shqiptarët paraqet platformë reale dhe shumëdimensionale. Ajo i prek çështjet kryesore, të cilat do ti kemi si çështje me prioritet për ti realizuar, si: Maqedonia shtet i barabartë mes maqedonëve dhe shqiptarëve, zyrtarimi i plotë i gjuhës shqipe, ndarja me proporcion të buxhetit, decentralizimin e pushtetit, rritja e punësimit, investime direkte, luftë ndaj mitos dhe korrupsionit, zhvillimin dhe reformimin e arsimit, investime në infrastrukturë në pjesën e banuar me shqiptarë si dhe shumë pika tjera. Platforma arrihet me ekip cilësor, me njerëz të pastër dhe të pakorruptuar, patriot dhe energjik me shumë përkushtim dhe vetëmohim, si dhe duke mos bërë pazare të ndryshme në dëm të platformës sonë.
Nëse nuk arritët të nënshkruani një koalicion parazgjedhor edhe me Lëvizjen BESA si parti e re në politikbërjen shqiptare në Maqedoni, a do ta bëni një gjë të tillë në rast se ju nevojiten mandatet e tyre për ta rrëzuar Bashkimin Demokratik për Integrim nga pushteti?
Morëm apo jo mandatin e plote nga votuesit, Aleanca për Shqiptarët pas zgjedhjeve do të kërkojë unifikimin e votës shqiptare për realizimin e kërkesave tona. Thellë jam i bindur se Aleanca për Shqiptarët do t’i fitojë zgjedhjet, ndërsa për matematikat pas procesit zgjedhor do vendosim së bashku, por ju sigurojë se ajo nuk do të bëhet në dëm të kërkesave të shumicës shqiptare.
Karadaku, përfshirë këtu Kumanovën dhe Likovën si pjesë e saj, gjithmonë ka qenë e anashkaluar nga pushteti, dhe çdoherë BDI ka siguruar thuajse fitore absolute në këtë rajon. Pse?
Fitore absolute? Nuk jam i pajtimit me këtë konstatim, meqë numri i votuesve shqiptarë që ka dalë në zgjedhje kurrë nuk e kaloi 50%, por gjithsesi fitorja e BDI ka disa arsye, si më të rëndësishme janë: vjedhja e votës, mospasja e opsionit të vërtetë opozitar, shantazhet dhe friga që mbolli partia në pushtet tek shqiptarët e kësaj treve.
Çka e dallon situatën e mëparshme nga kjo momentale që garanton humbjen e BDI-së në këtë zonë?
Shoh se njerëzit janë çliruar nga frika, shoh se populli është i ngopur me gënjeshtra e premtime boshe, populli nuk toleron 9 Majin, as rastet e vrasjeve politike të ish komandanteve të UÇK-së, as rasteve të montuara si janë “Monstra”, “Sopoti”, populli nuk toleron varfëri e mospasje ardhmëri, populli nuk dëshiron presione dhe shantazhime, kërkon punësim dhe investime në shkolla, spitale, investime në sport e për një rilindje kulturore.
Cili është mesazhi juaj për elektoratin shqiptarë në prag të ditës së zgjedhjeve?
Dilni votoni me 11 dhjetor! Dilni e shfrytëzoni votën tuaj, sepse dikush tjetër e shfrytëzon në emër tuaj! Dilni dhe zgjedhni opsionin më të mirë! Dilni dhe thuani stop frigës e presioneve, stop varfërisë dhe neglizhencës institucionale! Voto Aleancën për Shqiptarët, voto numër 7, numrin fitues! /tesheshi.com/
