Çdo njeri humb rreth 50 deri 100 fije flokë çdo ditë. Sipas dermatologëve, një sasi e tillë është shumë normale. Vetëm kur sasia e rënies së tyre shtohet ndjeshëm ne arrijmë të ndjejmë humbjen e flokëve apo ato që njihen si pulla në kokë. Kjo gjendje e flokëve njihet si alopecia.
Shumë persona kanë pasur eksperienca të këqija me humbjen e flokëve në moshën 30 vjeçare, në moshën e ndryshimeve hormonale, kur janë në stres apo në gjendje ankthi, apo edhe për shkak të rutinës së keqe të të ushqyerit. Më poshtë po ju prezantojmë disa kura efektive, të cilat do të japin rezultate dhe që nuk kanë shumë mundime për tu përgatitur.
Qepë dhe hudhër
A e dini se ushqimet që përdorim çdo ditë mund të shndërrohen në ilaçe natyrale për të na mbrojtur nga rënia e flokëve apo për të stimuluar rritjen e tyre? Sulfuri që ndodhet tek qepët ndihmon në prodhimin e kolagjenit. Qepët dhe hudhra janë të pasura me sulfur dhe kjo qartëson edhe arsyen se përse janë përdorur më së shumti në medikamentet për rritjen e flokëve.
Përgatitja:
Shtrydhni fort një kokërr qepë dhe lëngun e saj aplikojeni në skalpin e kokës. Lëreni të veprojë për 15 minuta dhe më pas lani kokën butësisht me shampo. Shtypni fort disa thelpinj hudhër, hidhini në pak vaj ulliri dhe lërini të ziejnë në zjarr të ulët për disa minuta. Pasi të ftohet pak përbërja, kur të jetë e vakët, aplikojeni në skalpin e kokës dhe lëreni aty për 10-15 minuta. Për rezultate të mira, kryejini këto rutina dy deri në tre herë në javë.
Kokosi
Një tjetër frut që mund t’ju vijë në ndihmë është kokosi, i cili është shumë efektiv në rritjen e flokëve. Qumështi i kokosit përmban proteina, yndyrna të mira dhe minerale, si potasi dhe hekuri, të cilat nëse aplikohen në mënyrë të rregullt në flokë mund të eliminojnë totalisht rënien e pakontrolluar të flokëve. Vaji i kokosit ndihmon në forcimin e flokëve në pjesën e rrënjëve. Përdorimi i rregullt i këtij vaji ndihmon në pastrimin e skalit të kokës nga zbokthi dhe shmang rënien e flokut.
Përgatitja:
Çani një arrë kokosi dhe qumështin e saj përziejeni me pak ujë. Vendosni këtë përzierje në atë pjesë të kokës që e ndieni se është më problematike, sa i takon rënies së flokëve. Lëreni të veprojë gjithë natën dhe në mëngjes lajeni me ujë të ngrohtë dhe me shampo.
Kënaja
Kënaja ka një rol të veçantë në forcimin dhe zgjatjen e flokëve, e këtë e dinë mirë aziatikët, të cilët e kanë pjesë të traditës e kulturës së tyre përdorimin e kënasë, në vend të bojërave të tjera. Kur ajo përzihet me vajin e mustardës jep rezultate të paimagjinueshme.
Përgatitja:
Hidhni rreth 250 ml vaj mustarde në një tigan dhe shtoni në të rreth 60 gramë këna të larë dhe të tharë mirë. Përzieni mirë përbërjen deri sa gjethet e kënasë të bëhen një me vajin e mustardës. Aplikojeni sa herë që lani flokët.
Hiri
Vaji i kokosit dhe hiri është sekreti i flokëve të shëndetshëm dhe që nuk thinjen kurrë tek personat që jetojnë në Kerala, Indi. Hiri ka veti rigjeneruese, të cilat veprojnë në flokë dhe eliminojnë zbardhjen e tyre si dhe zbokthin. Gjithashtu ndikon edhe në mosrënien e flokëve apo krijimin e pullave në kokë tek meshkujt (rreth moshës 30 vjeçare).
Përgatitja:
Hidhni disa lugë hi dhe përziejeni me vaj kokosi për të bërë një lloj xheli. Aplikojeni në skalpin e kokës, lëreni të veprojë për disa orë dhe më pas lajeni me ujë të ftohë dhe një pastrues (shampo).
Veza
Vezët janë një tjetër burim sulfuri. Vezët përmbajnë shumë proteina dhe minerale, si seleni, jodi, fosfori, hekuri dhe zinku. Kjo është arsyeja pse veza është një përbërës shumë i rëndësishëm dhe ka ndikim të menjëhershëm në rritjen e flokëve, kur bashkohet me vajin e ullirit.
Përgatitja:
Merrni pjesën e parë të një veze dhe hidhni një lugë çaji me vajë ulliri në të. Aplikojeni pjesë-pjesë në skalpin e kokës dhe në flokë. Mbajeni këtë përbërje rreth 15-20 minuta në kokë dhe më pas lajeni me ujë të ngrohtë dhe shampo./tesheshi.com/
