Ursula von der Leyen, kandidatja e Partisë Popullore Evropiane për Presidente të Komisionit, është e bindur se do të marrë një mandat të ri dhe shumicën e nevojshme në Parlamentin e sapozgjedhur Evropian.
“Po, kam besim për mandatin e ri, por sigurisht që kam ende shumë punë përpara”, tha von der Leyen.
Në një deklaratë pas shpalljes së rezultateve të para provizore për Parlamentin Evropian, ajo u shpreh e kënaqur me suksesin e PPE-së, e cila ende mbetet me më shumë përfaqësues dhe “spirancën e stabilitetit”.
“Këto zgjedhje na dërguan dy mesazhe: i pari është se ka ende një shumicë centriste për një Evropë të fortë dhe kjo është çelësi i stabilitetit. Por është gjithashtu e vërtetë se ka një mbështetje të shtuar për ekstremet në të majtë dhe në të djathtë, dhe kjo është arsyeja pse ky rezultat kërkon përgjegjësi edhe më të madhe nga partitë e qendrës”, tha Von der Leyen, kandidatja kryesore e PPE.
Ajo bëri të ditur se nga sot do të kontaktojë edhe dy grupet e tjera kryesore politike, socialdemokratët dhe liberalët, me të cilët dëshiron të krijojë një koalicion të gjerë për një Evropë të fortë. Ajo tha se kushdo që është pro-evropian, që mbështet Ukrainën dhe sundimin e ligjit është i mirëpritur.
Shumica për një Evropë të fortë
Ajo theksoi se bota është në trazira, se forcat brenda dhe jashtë BE-së po përpiqen të destabilizojnë dhe dobësojnë Evropën.
“Nuk do ta lejojmë kurrë këtë. Këto rezultate zgjedhore tregojnë se shumica e evropianëve duan një Evropë të fortë”, tha ajo.
Më herët është bërë e ditur se Partia Popullore Evropiane (EPP), e cila bashkon partitë e qendrës së djathtë, socialdemokratët dhe liberalët, ka ruajtur shumicën në mbledhjen e re të PE, sipas rezultateve të para preliminare të zgjedhjeve evropiane të mbajtura të dielën.
Sipas rezultateve të pjesshme, PPE do të ketë 189 përfaqësues, Social Demokratët (S&D) 135 dhe Liberalët (Rinovo) 80 përfaqësues.
Rritja e ekstremit të djathtë
Sipas rezultateve të para, partitë e ekstremit të djathtë të mbledhur në klubin përfaqësues të Konservatorëve dhe Reformistëve Evropianë (ECR) do të kenë 72 përfaqësues, tre më shumë se në parlamentin e mëparshëm.
Klubi përfaqësues i ekstremit të djathtë Identity and Democracy (ID) do të ketë 58 përfaqësues, nëntë më shumë se më parë.
Grupi i partive që hyjnë për herë të parë në Parlamentin Evropian apo për të cilat ende nuk dihet se cilit grup do t’i përkasin, ka 52 përfaqësues. Në këtë grup bëjnë pjesë edhe përfaqësues të Alternativës për Gjermaninë (AfD), e cila së fundmi u përjashtua nga klubi i ekstremit të djathtë të ID. /tesheshi.com/
