Shoqata Antikomuniste e të Përndjekurve Politikë të Shqipërisë kërkon ndalimin e zgjedhjes së Gramoz Ruçit në postin e kryetarit të Kuvendit.
Përmes një letre drejtuar Presidentit Ilir Meta, kreut të PD-së Lulzim Basha, kryetares së LSI-së Monika Kryemadhi dhe trupit diplomatik të akredituar në Tiranë, kjo shoqatë apelon për të mos lejuar zgjedhjen e ish-ministrit të Brendshëm të regjimit diktatorial në postin e numrit 2 të shtetit shqiptar.
“Kryeministri Rama , njëherazi edhe kreu i PS, ka propozuar zyrtarisht Gramoz Ruçin për Kryetar të Kuvendit te Shqipërisë në Legjislaturën e ardhme parlamentare.
Gramoz Ruçi është ministri i fundit i Brendshëm i diktaturës komuniste dhe një nga krerët e PPSH përgjegjës për krime kundër njerëzimit dhe gjenocid ndaj popullit shqiptar.
Ai ka qenë Sekretar i Parë Partisë së Punës i rrethit të Tepelenës nga viti 1988 deri në 1990, ku ka firmosur dhjetëra arrestime politike te kundërshtarëve të regjimit komunist.
Ai u emërua ne vitin 1990 në fillim zv/ ministër i Brendshëm, e me vonë ministër deri në prill të vitit 1991. Si në postin e zv/ministrit dhe atë të ministrit të Punëve të Brendshme mandati i tij u dallua nga akte të rënda të dhunës nga ana e regjimit komunist kundër civilëve. Urdhëroi dhe lejoi vrasjet e civilëve në kufijtë edhe pse ligji që e konsideronte arratisjen si tradhti ndaj atdheut ishte shfuqizuar. Gramoz Ruçi ka urdhëruar e firmosur masakrën e fundit të diktaturës komuniste në Shqipëri, “masakrën e 2 prillit” në Shkodër (4 të vdekur, 81 të plagosur)”, thuhet në letër.
Në vijim, kjo shoqatë e ish të përndjekurve e konsideron të turpshme që në një vend anëtar të NATO-s dhe që tenton të anëtarësohet në BE, të zgjidhet në krye të Parlamentit, të konsideruar si tempulli i demokracisë së një vendi, ish-drejtuesi i pjesës më kriminale të diktaturës komuniste, shefit të policisë së fshehtë politike, Sigurimit te Shtetit .
“Është në nderin tuaj të përdorni të gjithë autoritetin si President i Republikës, për të penguar zgjedhjen e Gramoz Ruçit në këtë detyrë”, thuhet ndër të tjera në letër./tesheshi.com/
