Nga Blendi Gashi
Koalicioni PDK-LDK, përkundër problemeve, ka hyrë në vitin e tretë qeverisës me synimin që të kalojë sfidat jo të pakta që e presin edhe këtë vit dhe të mbijetojë deri vitin e ardhshëm kur edhe i skadon mandati.
Por jetike për partnerët e koalicionit konsiderohet ky muaj dhe marsi, kur pritet përfundimisht të mësohet fati i Demarkacionit dhe Asociacionit.
Ndonëse LDK-ja, partia e kryeminsitrit Isa Mustafa shpreson dhe beson se do përfundojnë mandatin, pasi shprehen të bindur se kanë punuar mirë, në PDK-në e Kadri Veselit ka zëra të ndryshëm rreth fatit të koalicionit.
Krerët e kësaj partie edhe pse zyrtarisht thonë se “koalicioni është stabil dhe nuk ka arsye të prishet”, deputetë të caktuar të këtij subjekti në anën tjetër assesi nuk po pajtohen që vendi të vazhdojë të qeveriset nga kreu i LDK-së.
Burime të portalit tesheshi. com brenda PDK-së së Veselit bëjnë të ditur se pasi të miratohen Demarkacioni e Asociacioni do të shqyrtohet mundësia për rrëzimin e koalicionit përmes votëbesimit në Kuvend, në mënyrë që t’i hapet rrugë zgjedhjeve të parakohëshme.
Por kush janë deputetët e PDK-së që assesi nuk po mund ta shohin Mustafën kryeministër dhe janë gati ta japin votën e tyre për rrëzimin e tij?
Deputeti nga Lipjani, Shukri Buja, është më i zëshmi i cili në një intervistë dhënë më parë për tesheshi. com ka thënë se “i ngrihet tensioni kur e sheh Isën kryeministër”, dhe në vazhdimësi kërkon rrëzimin e qeverisë.
Shaip Muja, është deputeti i dytë që së fundmi ka dalë pro prishjes së koalicionit. Këtë e ka bërë jo vetëm përmes mediave por edhe gjatë deklarimeve në Kuvend, ku hedh në vazhdimësi kritika ndaj qeverisë duke thënë se “duhet të shkojë në shtëpi”.
Këta janë dy deputetët që tashmë publikisht kanë kërkuar rrëzimin e qeverisë.
Por sigurisht këta nuk janë të vetmit.
Portali tesheshi. com ka mësuar emrat edhe të dy deputetëve të tjerë të PDK-së që janë kundër koalicionit dhe do të votonin për prishjen e tij nëse inicohet një mocion mosbesimi në Kuvend.
Bëhet fjalë për deputetin nga Malisheva, Fatmir Shurdhaj, i cili ndonëse ende nuk është deklaruar publikisht për çështjen në fjalë, ai është i gatshëm të japë votën e tij për rrëzimin e qeverisë “Mustafa”.
Kurse deputeti tjetër është Nait Hasani, që njihet poashtu si një kritikues i koalicionit. (Megjithatë, ky i fundit ndonëse i pakënaqur, sipas burimit nuk dëshiron të dalë publikisht për prishjen e koalicionit).
Por nuk janë vetëm këta. Burimi ynë thotë se janë edhe disa deputetë tjerë të PDK-së që nuk pajtohen me këtë lloj qeverisje, por të cilët ende nuk po flasin publikisht njëjtë si Hasani, për arsye të cilat vetëm ata i dijnë.
“Besoj që koalicioni do shqyrtohet shumë shpejt. Besoj që kjo do të ndodh menjëherë pasi të miratohen Demarkacioni e Asociacioni. PDK do mblidhet pasi të kalojnë këto obligime ndërkombëtare dhe më pas do marrë vendim për shqyrtimin e koalicionit, gjegjësisht që të dal nga koalicioni dhe të çojë vendin në zgjedhje”, thotë burimi.
Se ka shumë deputetë të pakënaqur brenda PDK-së me koalicionin aktual e tha ditë më parë edhe deputeti Shaip Muja një prej të pakënaqurve.
“Ne jemi disa deputetë të cilët vazhdimisht po kërkojmë shqyrtimin e koalicionit dhe të cilët nuk jemi të dakorduar me këtë lloj qeverisje, por është më rëndësi qe strukturat e partisë të mblidhen dhe të vendosin. Mendoj që janë pjekur kushtet që vet tani PDK-ja të flasë e të divrcohet nga koalicioni menjëherë”, ka thënë ai, për mediat kosovare.
Ndryshe, koalicioni PDK-LDK-së është arritur në fund të vitit 2014. Gjatë kësaj kohe ka pasur përplasje dhe polemika mes zyrtarëve të kësaj partie, por të cilat nuk kanë ndikuar deri më tani në harmoninë mes liderëve të PDK-së dhe LDK-së. /tesheshi.com/
