Nga Blendi Gashi
Data 24 gusht mund të jetë përcaktuese për fatin e zgjedhjes së institucioneve, së pari të kryekuvendarit e më pas edhe qeverisë, apo për thellimin e krizës që mund të çojë sërish vendin në zgjedhje të parakohshme parlamentare.
Opisioni i fundit shihet si i mundshëm, për çka janë deklaruar edhe zyrtarë të partive, pasi zgjedhjet që u mbajtën dy muaj më parë kanë prodhuar një tjetër krizë.
Janë përfaqësues të LDK-së që ditëve të fundit më së shumti janë deklaruar rreth shkuarjes në zgjedhje, por që çuditërisht pa një qëndrim unik.
Luta e Hykmetja me qëndrime të kundërta…
Nënkryetari i LDK-së, Lutfi Haziri dhe ish-ministrja Hykmete Bajrami janë dy zyrtarët e lartë të këtij subjekti që haptas kanë dalë me qëndrime të kundërta sa i përket zgjedhjeve të reja.
Haziri, së fundmi ka deklaruar për mediat kosovare se “alternativa më e qëndrueshme për të zgjidhur ngërçin politik janë zgjedhjet e reja nacionale”.
Por bashkëpartiakja e tij Hykemte Bajrami, e cila ka fituar postin e deputetes në zgjedhjet e 11 qershorit ka mendim krejt tjetër.
“Shkuarja në zgjedhje të tjera nuk është alternativë sepse askush nuk mund të garantoj se do të kemi një rezultat tjetër. Ata që e kanë marrë mandatin duhet të marrin përgjegjësi dhe të japin propozimin për kryetar të Kuvendit”, ka thënë Bajrami në takimin që e organizoi koalicioni LDK-AKR-Alternativa ku u bisedua për bojkotin e PAN-it që po i bën Kuvendit dhe mënyrës si të dilet nga ngërçi politik.
Avdyli e Ferati në anën e Lutës…
Megjithatë, duhet theksuar se deputetja Bajrami është pakicë në LDK, pasi qëndrimi dominant është ai për të shkuar dhe njëherë te kutitë e votimit.
“Pro” zgjedhjeve janë shprehur edhe deputeti i ri i LDK-së, Haxhi Avdyli i cili ka thënë se “nëse s’mirremi vesh, shkojmë në zgjedhje tjera e ia shpenzojmë edhe nja 5 milion buxhetit të Kosovës”.
Edhe anëtari i Këshillit të Përgjithshëm të LDK-së, Sadri Ferati ka thënë se “në situatën në të cilën jemi, të zgjedhjes së kryetarit të Kuvendit, janë dy zgjidhje, ose duhet të votohet kandidati i PAN-it, ose duhet të shkohet në zgjedhje të reja”.
Pavarësisht deklarimeve të tilla, lidhur me zgjedhjet e reja eventuale, ende nuk e kanë thënë fjalën e tyre kreu i partisë Isa Mustafa dhe shefi i frupit parlamentar Avdullah Hotit të cilët shpresojnë që PAN të dështojë dhe më pas partia e tyre të formojë institucionet, pse jo të përfitojë nga pazaret politike dhe ta marrë sërish postin e kryeministrit edhe pse vështirë se Vetëvendosje do të lëshon pe. /tesheshi.com/
