Presidenti rus Vladimir Putin ka “frikë” nga negociatat për t’i dhënë fund luftës në Ukrainë, tha presidenti ukrainas Volodymyr Zelensky.
“Sot, Putini konfirmoi edhe një herë se ka frikë nga negociatat, se ka frikë nga liderët e fortë dhe se po bën gjithçka për të zgjatur luftën”, shkroi Zelensky në platformën X, pasi presidenti rus përjashtoi bisedimet e drejtpërdrejta me të.
Putin më parë tha se konflikti në Ukrainë do të përfundonte brenda “dy muajve” pa ndihmën ushtarake nga aleatët perëndimorë për Ukrainën, e cila ka frikë nga një reduktim drastik i ndihmës amerikane me kthimin në pushtet të Donald Trump.
“Ata (ukrainasit) nuk mund të mbijetojnë, nuk do të zgjasin një muaj nëse paratë dhe municioni në përgjithësi mbarojnë. Gjithçka do të përfundonte brenda një muaji e gjysmë apo dy”, tha Putin në një intervistë për televizionin shtetëror rus.
Presidenti rus shtoi se negociatat janë të mundshme për t’i dhënë fund konfliktit në Ukrainë, por ai përjashtoi bisedimet e drejtpërdrejta me presidentin ukrainas Volodymyr Zelensky, të cilin ai e konsideron “të paligjshëm”.
Pushtimi rus i Ukrainës filloi më 24 shkurt 2022. /tesheshi.com/
