Një ditë më parë, Trump akuzoi paraardhësin e tij për përgjim të bisedave të tij telefonike. Sipas britanikes The Guardian, e tëra kjo ka nxitur më tej spekulimin se komentet e Trump-it janë rrjedhojë e historive që qarkullojnë në median e djathtë, mes të cilave ajo e përpjekjes së Obama-s për një “puç të heshtur” ndaj presidentit aktual.
“E tmerrshme! Sapo u zbulua se Obama i kishte përgjuar bisedat e mia telefonike në Trump Tower pak para fitores,” qe një prej postimeve të Donald Trump-it në Twitter.
“Sa poshtë ka rënë presidenti Obama, sa të përgjojë telefonat e mi pikërisht gjatë procesit të shenjtë të zgjedhjeve,” do të shkruante po ashtu ai në të njëjtin rrjet social.
Akuzave u është përgjigjur zëdhënësi i Barack Obama-s, që ka hedhur poshtë gjithçka, duke mos lënë vend për asnjë hamendje.
“As presidenti Obama, as ndonjë zyrtar i Shtëpisë së Bardhë nuk ka urdhëruar mbikëqyrje të ndonjë qytetari amerikan. Çdo sugjerim ndryshe është thjesht i rremë,” tha në një deklaratë Kevin Lewis.
Ai do të shtonte në të njëjtën kohë se, “një rregull kardinal i administratës Obama ishte se asnjë zyrtar i Shtëpisë së Bardhë nuk ndërhynte kurrë në ndonjë hetim të pavarur të drejtuar nga Departamenti i Drejtësisë”.
Ky nënvizim, thonë mediat ndërkombëtare, lë ndërkohë të hapur mundësinë që nga zyrtarët e Departamentit të Drejtësisë të jetë urdhëruar një përgjim telefonik i fushatës së Trump-it.
Në të njëjtën linjë kundërshtimi qe dhe një ish-këshilltar i Obama-s, Ben Rhodes, që reagoi po në Twitter, “Asnjë president nuk mund të urdhërojë një përgjim telefonik. Këto kufizime qenë vendosur për t’i mbrojtur qytetarët nga njerëz si ju.”
Ende nuk është e njohur asnjë provë që Obama të ketë urdhëruar përgjime të tilla telefonike, dhe, siç thotë The Guardian, nuk është e qartë se në çfarë informacioni i mbështet Trump-i pretendimet e tij. /tesheshi.com/
