Gjykata e Lartë e Kroacisë vendosi të kthejë për shqyrtim nga e para çështjen për ekstradimin në Serbi të Ismail Morinës, personit që ngriti dronin në mes të stadiumit të Beogradit. Vendimi për të rishqyrtuar çështjen, bllokon çdo vendim për ekstradimin e tij pas kërkesës së Serbisë.
Tashmë pritet që çështja të shqyrtohet edhe njëherë nga shkalla e parë e gjykatës kroate, për të vijuar më tej me të gjitha shkallët gjyqësore nëse palët nuk do të jenë të kënaqura me vendimin.
Pas kërkesës së Serbisë për esktradimin e tij, pala shqiptare nisi negociatat zyrtare me shtetin kroat, lidhur me këtë çështje, duke paraqitur të gjitha arsyet se përse Ballisti nuk duhej të ekstradohej në Serbi.
Kërkesa e Ministrisë së Drejtësisë të Shqipërisë
“Më lejoni që në vijim të komunikimit mbi shtetasin shqiptar Ismail Morina, subjekt ekstradimi nga Kroacia në Serbi, në lidhje me shqetësimin dhe dyshimin e keqpërdorimit nga autoritetet serbe për qëllime politikë të rastit të ekstradimit të këtij shtetasi, të argumentoj bindjen tone sa vijon; ne konsiderojmë se ka arsye të bazuara për refuzimin e ekstradimit të Ismail Morinës. Vepra penale “nxitja e urrejtjes dhe intolerancës kombëtare, racore dhe fetare, për të cilën gjykata e Shkallës së Parë së Dubrovnikut, ka vendosur ekstradimin e Morinës në Serbi, të dyshuar si të kryer gjatë ndeshjes së futbollit Serbi-Shqipëri, ka elementë të mjaftueshëm për tu cilësuar si vepër politike”.
Gjykata e Arbitrazhit të Sporteve Gjenevë, në vendimin CAS 2015 /A/3874 me datë 10 korrik 2015, i referohet gjithë ngjarjes që fillon me kërcënimet para fillimit të ndeshjes, me thirrjet politike gjatë kohës që luhej himni shqiptar duke shpalosur dhe banerat me parullat “Vrisni, Vrisni Shqiptarët” dhe “Vrisni Shqiptarët, derisa të shfarosën” si dhe shenja e flamuj të paligjshëm. Në një kohë këto reagime politike antishqiptare vijuan duke u shoqëruar me incidentet fizike deri në ndërprerjen e ndeshjes.
Pas analizës së hollësishme të provave filmike dhe dëshmive të palëve, kjo gjykata konkludoi se “përsa i përket natyrës së shkeljeve,….duke përfshirë….të gjithë incidentet që kanë ndodhur përpara dhe gjatë ndeshjes së mësipërme, nuk ishin me natyrë nacionale apo ksenofobike, por janë të bazuara në arsye politike. Nga ana tjetër, deklaratat politike të drejtuesve të Serbisë deri në kufi të fushatës antipolitike shqiptare, gjatë gjithë periudhës së shqyrtimit gjyqësor të çështjes, përforcuan bindjen gjyqësore se elementët politikë janë në këtë ngjarje.
Ne kemi bindje, mbi bazën e provave sa vijon, se jeta e Ismail Morinës rrezikohet nëse ekstradohet në Serbi. Kërcënimet ndaj Ismail Morinës janë publikuar në kuadrin e sensacionit, edhe nga mediat, qoftë media e shkruar ashtu dhe elektronike. Gazeta Kurir ka botuar vazhdimisht opinione të ndryshme për Ismail Morinën, një pjesë e të cilave janë kërcënime të pastra për jetën e tij. i referohemi lajmit kërcënues postuar me datë 5 dhjetor 2014, sipas të cilit një biznesmen serb që jeton në Cikago të SHBA i ka premtuar 1 milion euro personit që siguron autorin e lëshimit të dronit në fushën serbe të futbollit. Portali Sportal.al ka zbuluar bisedën që është bërë mes disa huliganëve serbë, duke planifikuar se si do të hakmerren ndaj Ismail (Ballist) Morinës”. /tesheshi.com/
