Aktivisti i lëvizjes Vetëvendosje, Astrit Dehar është vrarë, duke u goditur me mjete të forta. Ka qenë kjo deklarata e trnditëse e avokatit të familjes së të ndjerit, Tom Gashi, teksa prezantoi raportet e Mjekësisë Ligjore dhe të ekspertëve të pavarur.
“Në raport nuk përmendet vetëvrasja, pasi nuk janë kryer hetime që konstatojnë aktin e vetëvrasjes”, u shpreh Gashi.
Sipas tij, i gjithë dokumentacioni i siguruar vërteton se Dehari është vrarë dhe jo vetëvrarë, siç është pretenduar deri tani nga prokuroria.
Ai ka prezantuar dokumente dhe fotografi, të cilat sipas tij, dëshmojnë se Astrit Dehari ka vdekur si pasojë e lëndimeve që i janë shkaktuar nga goditjet me një mjet të fortë, lëndime këto që nuk mund të shkaktohen në asnjë mënyrë nga vetë viktima.
Astrit Dehari, 26 vjeç vdiq në Qendrën e Paraburgimit në Prizren, më 5 nëntor. Ai po mbahej në paraburgim si i dyshuar për sulm ndaj Kuvendit të Kosovës./tesheshi.com/
