Washington Post botoi sot transkripte të plota të dy thirrjeve të para telefonike të Presidentit të SHBA, Donald Trump me drejtuesit e huaj, menjëherë pasi hyri në zyrën e tij në janar.
Transkriptet tregojnë bisedat e tij me presidentin meksikan Enrique Peña Nieto dhe me Kryeministrin australian Malcolm Turnbull, të dyja këto biseda të cilat u kthyen në diskutime të nxehta lidhur me çështjet e emigracionit.
Gjatë bisedës së tij me Nieto, Trump në një moment përmend kryeministrin izraelit, duke thënë se ai mbështetet në këshillën e Netanjahut kur ai thotë se Shtetet e Bashkuara duhet të ndërtojnë një mur përgjatë kufirit me Meksikën.
Marrja e Netanjahut për referencë erdhi gjatë një bisede të nxehtë mes Trump-it me Presidentin meksikan, gjatë së cilës të dy udhëheqësit haptazi kishin mospajtime lidhur me atë se si do të trajtonin publikisht çështjen se “kush do të paguajë” për murin kufitar, që ishte pjesë e premtimeve të Trump drejtuar votuesve të tij gjatë Zgjedhjeve 2016.
“E dini, shikoni Izraelin. Izraeli ka një mur, edhe pse të gjithë kanë thënë mos ndërtoni mur, ngase muret nuk funksionojnë. 99,9 për qind e njerëzve që përpiqen të kalojnë nëpër atë mur nuk mund të kalojnë më”, i thotë Trump Peña Nieto-s. Më pas shton: “Bibi Netanjahu më tha se muri me të vërtetë funksionon”.
Postimi i Netanjahut në Twitter shkaktoi një stuhi diplomatike midis dy vendeve. Kriza u zgjidh vetëm pasi Presidenti izraelit Reuven Rivlin e thirri presidentin meksikan Peña Nieto.
“Jam i sigurt se askush nuk ka pasur për qëllim që të bëjë një krahasim mes situatës në Izrael dhe asaj në Meksikë. Ishte e gjitha një keqkuptim,” tha Rivlin.
Peña Nieto falenderoi Rivlin për përpjekjet e tij për të zgjidhur krizën.
“Dua të theksoj se Meksika gjithmonë ka pasur marrëdhënie të ngushta me Izraelin dhe ne duam që të vazhdojmë në këtë rrugë,” tha ai. Për fat të keq, shtoi ai, lidhjet ishin dëmtuar për shkak të postimit të Netanjahut në Twitter.
Gjatë bisedës së tij me Peña Nieto, Trump i kërkoi homologut të tij meksikan disa herë që të mos thotë publikisht se Meksika nuk do të paguajë për murin. “Ju nuk mund ta thoni atë në shtyp,” i tha ai në një moment, “Ju nuk mund ta thoni këtë për shtyp, sepse unë nuk mund të negocioj në ato rrethana”.
Kjo duket si një pranim nga ana e Trump, se Meksika nuk do të paguajë në të vërtetë për murin, pavarësisht premtimit të tij elektoral. Ndërsa, në anën tjetër Peña Nieto u përgjigj se ai nuk ka zgjidhje tjetër përveçse të deklarojë pozitën e tij publikisht. /tesheshi.com/
