Deputeti i Nisma-s, Zafir Berisha, pak minuta para nisjes së seancës ku do të votohet qeveria Haradinaj, ka bërë të njohur vendimin për të mos mbështetur me votë kabinetin.
Përmes një postimi në Facebook, ai ka dhënë edhe arsyet se pse vota e tij nuk do të jetë pro.
“Me gjithë respektin tim personal për Ramushin, mendoj se respekti për Kosovën dhe institucionet tejkalon atë ndaj individit, prandaj dëshiroj t´u bëj me dije arsyet e mia se pse nuk do ti jap besimin kësaj Qeverie.
“Kumbari” i këtij koalicioni është kryehajduti i Kosovës Hashim Thaqi, personi përgjegjës për dështimin e shtetit, të bërë me shumë sakrificë e gjak.
Qasja jokorrekte, joparimore dhe ofenduse e familjes Pacolli dhe Listës Serbska lidhur me Qeverinë e re Haradinaj.
Emra jo të denjë me të kaluar të dyshimtë korruptive si dhe protagonistë të aferës “PRONTO”.
Ka edhe 101 arsye pse nuk duhet të keqpërdor besimin tuaj dhe të votoj këtë kombinim qeverisës, ndërsa nuk gjej asnjë arsye të vetme pse duhet të veproj ndryshe”, shkruan Zafir Berisha./tesheshi.com/
