Maqedonia veriore po bëhet gati për “30 qershorin” e saj, pasi ish-kryeministri Zaev, tashmë vetëm si lider i LSDM-së, propozoi shtyrjen e zgjedhjeve të 12 prillit.
Por ndryshe nga precedenti shqiptar i para një viti, pra ai që lidhet me emrin e presidentit Meta, Zaev kërkon që të gjendet baza ligjore e shtyerjes.
Kreu i LSDM-së pas takimit të liderëve në VIlën Vodno theksoi se ai ka propozuar që të shqyrtohet shpallja e gjendjes së jashtëzakonshme në territorin e shtetit.
“Sot kur kemi një armik të përbashkët të quajtur virusi korona nuk është koha për kundërshtarë politikë. Kemi përkuar nga presidenti Pendarovski që të mbledhë një ekip ekspertësh për të gjetur mënyrën ligjore dhe formale për shtyrjen e zgjedhjeve”, tha Zaev.
Të njëjtën gjë kërkoi dhe Bujar Osmani nga BDI.
“Shëndeti dhe siguria e qytetarëve nuk kanë çmim. Zgjedhjet do të duhet të anulohen sepse shëndeti i qytetarëve është më i rëndësishëm. Mënyrën se si do të implementohet ky vendim politik i mbetet presidentit së bashku me ekspertët që të vendosë në orët dhe ditët në vazhdim,” tha Osmani. /tesheshi.com/
