“Roli i Ankarasë në konfliktin sirian është që t’i bëjë bashkë Rusinë, SHBA dhe Iranin, me qëllim gjetjen e një zgjidhjeje për luftën në këtë vend”, ka thënë kryeministri turk, Binali Yildirim.
Siç ka theksuar ai, në këtë proces mund të marrë pjesë edhe Arabia Saudite.
“Në këtë mënyrë do të ndërpritet gjakderdhja në rajon dhe do t’i jepet fund vrasjes së civilëve të pafajshëm”, ka shtuar më tej shefi i qeverisë së Ankarasë.
Ai vuri në dukje se mungesa e një konsensusi mes Moskës dhe Uashingtonit po e komplikon situatën në Siri nga dita në ditë.
“Ky vakum i vullnetit politik, i cili është shfaqur për shkak të zgjedhjeve të ardhshme në SHBA, për fat të keq ka çuar në një situatë e rënduar në rajon”, ka thënë kryeministri turk.
Ai ka shtuar më tej se për shkak të kësaj, përgjegjësia më e madhe bie mbi Rusinë, ngase sipas tij Moska paraqet një faktor me rëndësi në problemin e përgjithshëm sirian.
“Ka ardhur koha që Moska duhet të përdorë ndikimin e saj mbi presidentin Bashar al-Assad. Mendoj se Rusia duhet të marrë qëndrim më aktiv në mënyrë që të ndërpriten viktimat e pafajshme”, ka deklaruar Yildirim. /tesheshi.com/
