Kryetari i komisionit të posaçëm për reformën në drejtësi, Fatmir Xhafaj thotë se reforma nuk kërkon makiazh, por ndërhyrje kirurgjikale. Ai i bëri këto komente ndërsa përmblodhi para gazetarëve punën e deritanishme të komisionit dhe axhendën e sezonit të ri.
Së pari, sipas Xhafajt, reforma në Drejtësi është në drejtimin e duhur. Komisioni ka përfunduar fazën e parë të procesit, që është dokumenti analitik i sistemit të drejtësisë në vend si dhe dokumentin strategjik, për ndërhyrjet kushtetuese e ligjore.
Komisioni, tashmë, është në kontakt me partnerët ndërkombëtarë për fazat e tjera të reformës në drejtësi.
“Reforma do të jetë e dhimbshme në shumë aspekte pasi do të synojë pastrimin e sistemit nga njerëzit e korruptuar. Zemra e këtij procesi janë ekspertët vendas dhe të huaj. Shpresoj në vullnetin e mirë të Opozitës në këtë proces”, tha ai.
Xhafaj konfirmoi se prokurori i Përgjithshëm nuk do të ketë më rolin që ka, pasi të përfundojë reforma. Sipas tij, Prokurori i Përgjithshëm nuk do të jetë i cënueshëm nga politika, por në të njëjtën kohë do të ulet ndikimi i tij në vendime dhe tek prokurorët e tjerë. /tesheshi.com/
