Kryeministri Rama përdori një narrativë gati romantike për t’u mbushur mendjen të rinjve që mos e shohin vëngër Shqipërinë e të zgjedhin ikje. Në një takim me sosh që janë angazhuar në Administratën Publike, ai u tha atyre se duhet të bëjnë atë që jua kanë borxh gjyshërve e prindërve të tyre.
“Jeni shumë vonë ju për të menduar të ikni dhe më besoni, po ikët, do ta kuptoni që keni bërë zgjedhjen e gabuar, por nga ana tjetër jeni shumë herët për të mos e parë me shumë optimizëm se çfarë mund të jetë Shqipëria edhe falë jush. Jo pas 100 vjetësh, por brenda 10 vitesh, kur ju të jeni ende në shërbim të shtetit dhe do të keni ende shumë kohë që ta shihni atë që gjyshërit tuaj, prindërit tuaj, për të mos folur për stërgjyshërit tuaj, nuk guxonin ta ëndërronin se mund ta shihnin. Duhet të jeni të sigurt që në fund kjo botë është e atyre që guxojnë, kjo botë është e atyre që rezistojnë, kjo botë është e atyre që në vend që të gjejnë justifikime dhe arsye për t’u ankuar dhe për t’ia lënë fajin të tjerëve është e atyre që për të realizuar qëllimet e tyre nuk harxhojnë kohë as me justifikime e as me fajësimin të tjerëve, por vetëm shohin përpara dhe çdo goditje, çdo dështim, çdo rrëzim, çdo mos vlerësim nuk e marrin si një arsye për t’u dorëzuar e për të shkuar në kafene e të thonë: ‘nuk bëhet ky vend mo lale, po hajde të bëjmë ndonjë lek’, por e marrin si një arsye më shumë për të vazhduar kokëfortësish për të realizuar atë që kanë në kokë”, u shpreh Rama.
Interesant, pasi njeriu që qeveris Shqipërinë për më shumë se një dekadë, si askush në postkomunizëm, artikulon fraza të tilla që i përkasin një lloj opozite, siç ajo e Adriatik Lapajt (Lëvizja Shqipëria Bëhet), ose ose e thotë këtë nën bindjen e fortë masive se Shqipëria nuk po bëhet as me të në udhëheqje, një besim që ekzistonte deri dje, kur ai morri pushtetin. /tesheshi.com/
