Kryelajm në mediat kosovare së fundi ka qenë një atentat në tentativë ndaj Albin Kurtit në Shkup, për të cilin ka reaguar dhe ai vetë.
“Kam mësuar që ka shumë kërcënime nga individë e struktura të cilat i kanë rrënjët e tyre në Beogradin zyrtar. Sa erdha nga Shkupi, nuk jam ndier i rrezikuar, por kam parë që kishte shumë forca policore që u kujdesen për këtë mbledhje që e mbajtëm, e ku mysafiri special ishte përfaqësuesi i SPD-së gjermane, Lars Klingbeil”, ka shkruar Kurti pa dhënë shumë detaje të tjera.
Sipas asaj çfarë shkruajnë mediat kosovare, plani për ta vrarë Kurtin është thurrur në Serbi.
“Ka qenë një kombinacion operativ serb, ku janë gërshetuar mashtrimet mediatike me veprimet në terren nga atentatorë të mundshëm të ekstremit serbo-maqedonas, të afërt me Federatën Ruse, por nën kontrollin e institucioneve serbe”, ka thënë burimi për RTK-në.
Ky zhvillim vjen në kohën e një tensionimi raportesh Prishtinë-Beograd, paçka thirrjeve për dialog e normalizimin marrëdhëniesh. /tesheshi.com/
