Një person i cili ka grabitur dhe vrarë udhëtarët e një furgoni në vitin e tmerrshëm 1997, u dënua në mungesa nga gjykatat shqiptare por arriti të largohet në Britaninë e Madhe, duke fshehur identitetin.
Sot pas 18 vitesh, i dënuari Fatmir Xhelili(Çaushi) 41 vjeç nga Vlora është ekstraduar në Shqipëri për të kryer dënimin. Siç njofton për tesheshi.com, zëdhënësi i Drejtorisë së Policisë së Shtetit, Genti Mullai, “Gjykata e Rrethit Gjyqësor Vlorë, me vendimin Nr. 53, datë 05.03.2003, e ka dënuar shtetasin e mësipërm me “Burgim të Përjetshëm“, për kryerjen e veprës penale të “Vjedhje me armë në bashkëpunim me pasojë vdekjen”,parashikuar nga neni 140 dhe 25 i Kodit Penal”.
Ngjarja e vitit 1997
Në datën 17.04.1997 rreth orës 05.00, shtetasi Fatmir Çaushi në bashkëpunim me shtetasin Tomor Çaushi, të maskuar dhe me armë zjarri , kanë ndaluar automjetin tip furgon në një kthesë afër fshatit Ploçe.
Këta shtetas kanë grabitur pasagjerët, ku dy prej pasagjerëve H.Xh dhe R.N janë qëlluar me armë zjarri dhe nuk kanë mundur të mbijetojnë megjithë ndihmën e dhënë në spitalin më të afërt.
Si rezultat i bashkëpunimit të Interpol Tirana me Interpol Manchester, u bë i mundur arrestimi i tij në Britanine e Madhe me qëllim ekstradimi drejt vendit tonë. Në Rinas shtetasi i sipërpërmendur iu dorëzua përfaqësuesve të Drejtorisë së Përgjithshme të Burgjeve.
/tesheshi.com/
