Është arrestuar më në fund porositësi i një vrasjeje të bujshme të ndodhur një vit më parë.
Bëhet fjalë për ekzekutimin e ish-komisarit Artan Cuku, qëlluar nga Mikel Shallari, vrasës me pagesë, i cili si i penduar vendosi t’i rëfejë policisë gjithçka. Ai ishte paguar 3 mijë euro nga Bledar Jambelli për vrasjen e komisar Cukut. Motivi ka qenë hakmarrje. Kur i ndjeri Cuku mbante detyrën e Drejtorit të Policisë së Vlorës, e kishte arrestuar Jambelli.
Njoftimi zyrtar i policisë sqaron kapjen e tij:
“Falë bashkëpunimit ndërkombëtar, bie në praga i dyshuari kryesor për porositjen e vrasjes së ish-oficerit të lartë të Policisë A.C.
Në kuadër të shkëmbimit të informacioneve me zyrat homologe dhe bashkëpunimit të Interpol Tirana me Interpol Athinën është finalizuar me sukses arrestimi në Athinë / Greqi, i personit në kërkim ndërkombëtar, Bledar Jambelli, alias Rikardo Muho, 38 vjeç, lindur në Fier.
Nga hetimet e kryera nga Policia e Tiranës në bashkëpunim të ngushtë me Prokurorinë dyshohet se ky shtetas ka porositur vrasjen e A.C.
Po nga hetimi rezulton se motivi i krimit lidhet me arrestimin e tij në kohën kur viktima kryente detyrën e Drejtorit të Policisë Vlorë.
Ky person është shpallur në kërkim ndërkombëtar nga ana jonë më datë 13.06.2017, pasi Gjykata e Shkallës së Parë për Krimet e Rënda, me vendimin nr. 292, datë 12.06.2017, ka vendosur masën e sigurisë Arrest me burg, për veprën penale “Vrasja e Punonjësit të Policisë së Shtetit” e kryer në bashkëpunim, parashikuar nga nenet 79/b dhe 25 të Kodit Penal.
Arrestimi i tij në Greqi me qëllim ekstradimi drejt vendit tone”, thuhet në njoftim. /tesheshi.com/
