Nga Bekim Laci
Policia e Kumanovës ka vënë në pranga 2 persona, ndërsa disa tjerë i ka marë në një bisedë informative për të zbardhur dhe dokumentuar incidentin e djeshëm si pasojë e të cilit mbeti i vrarë Xhemail Rexhepi, i njohur si “Komandant Shqiponja”, dhe mbetën të plagosur dy të tjerë.
Në mesin e të arrestuarve është edhe i vetdorëzuari në polici, Bajram Limani, ushtruesi i detyrës së kryetarit të BDI-së në Kumanovë, si i dyshuari dhe i akuzuari kryesor për vrasjen e komandant “Shqiponjës”.
Siç informoi SPB-ja e Kumanovës, dy personat SH.R dhe G.D janë lënduar dhe për shkak të karakterit të lëndimeve, janë dërguar në Urgjencën e Shkupit.
Siç mësohet nga njerëz të cilët janë të mirënformuar për ngjarjen, incidenti ka ndodhur para zyras ku është mbajtur mbledhja e degës së BDI-së në Kumanovë, për të cilën degë pretendent kryesor ka qenë tanimë i ndjeri komandant “Shqiponja”, si personi i vetëm që ka shpallur kandidaturën e tij për kryetar dege, ndërkohë që s’ka patur asnjë kundërkandidat.
Të afërmit e Rexhepit thonë për portalin tesheshi.com se me delegim nga lart (kryesia e BDI-së, Ali Ahmeti) është përcaktuar një ushtrues detyre, vendim me të cilin nuk është pajtuar i ndjeri Rexhepi, sepse siç ka potencuar vetë ai shumë herë, ka kërkuar zgjedhje demokratike brenda degës, andaj për të përcaktimi i një ushtruesit detyre ka qenë e palogjikshme dhe e panevojshme në rast kur ka kandidatë për ta drejtuar degën e partisë i cili gëzon dhe përkrahje të madhe brenda degës në Kumanovë, gjë që e ka pretenduar pra i ndjeri, Xhemail Rrexhepi.
Dhe komandant “Shqiponja”, sikur e parandjente fatin e tij tragjik. Kohë më parë në profilin e tij kishte shkruar:
“Për as 1 milimetër mbrapa nuk do të kthehem kur bëhet fjalë për degën e BDI Kumanovë. Edhe njëherë e potencoj përmes rrjetit social fb, përmes faqes time, se ashtu do të jetë deri në fund, qoftë me arrestim e qoftë me likuidim fizik. Komandanti juaj i Kumanovës Shqiponja nuk do të hek dorë nga kryetari i degës deri në frymën e fundit. Zoti na ndihmoftë. Zoti na bekoftë gjithë shqiptarëve. “Kumanova e Shqiponjave”.
Incidenti fatal në Kumanovë është kulminacioni i përleshjeve fizike mes rrymave rivale në BDI sepse edhe më herët të tilla janë regjistruar në Kumanovë, Saraj dhe Strugë, por gjithmonë me arsyetimin partiak se janë dukuri normale në procese demokratike. /tesheshi.com/
