Votat e të paktën dy deputetëve të PD-së pro kandidaturës së Gramoz Ruçit si kryetar i Kuvendit, duket se kanë rikthyer debatet në partinë më të madhe të opozitës.
Shigjetat janë drejtuar ndaj Lulzim Bashës, si kryetar i PD-së, ndërsa ai ende nuk ka bërë një koment mbi atë çfarë ka ndodhur.
Fakti që votimi ishte i fshehtë, dyshimet ngrihen mbi secilin prej 43 deputetëve të PD-së, megjithëse Lulzim Basha votoi hapur kundër Ruçit.
Valentina Duka, kryesuesja e listës së deputetëve të Korçës, ka kërkuar llogari te kryesia e grupit parlamentar mbi atë që ka ndodhur. Sikundër raportohet ajo ka thënë se i takon drejtuesve të bëjnë llogaritë dhe të nxjerrin përfundime.
Dashamir Shehi gjithashtu ka drejtuar gishtin te Basha, duke i kërkuar që të gjejë kush janë deputetët. Shehi duket se ka pasur më shumë inatin me komentet që janë bërë në rrjetet sociale, që akuzojnë drejtuesit e partive të vogla, për atë që ka ndodhur.
Në fakt pas votimit, në rrjet u artikuluan akuza dhe kundërakuza, pro dhe kundër Bashës, të cilat rikthyen sherret në distancë mes grupimeve në PD.
Por ndoshta për herë të parë, edhe ish-kryeministri Sali Berisha nuk ka mundur të justifikojë atë çka ndodhi. Nëse në debatet e muajve më parë, ai kishte argumente për të kritikuar ata që njiheshin si grupimi anti-Basha, tashmë e ka të vështirë të identifikojë ndokënd si të tillë, përsa kohë ata që kanë mbetur qëndrojnë edhe në krah të tij.
“Kam dalë me kokën ulur nga salla, jam ndjerë i fyer dhe i lënduar”, raportohet të ketë thënë Berisha, megjithëse në seancën e djeshme nuk i mungoi humori dhe batutat ndaj Anastas Angjelit, të cilin me vite me rradhë e akuzonte si mamuthin e korrupsionit.
Dyshimet e ngritura nga disa deputetë demokratë ishin ato se rezultati mund të ishte manipuluar, por këtë version as Basha nuk e beson. Thjesht version i hedhur ndezi më tepër debatet në distancë, akuzat ndaj kreut të PD-së dhe situatën në këtë parti.
Por, e gjithë kjo riktheu në skenë ish-deputetët demokratë të larguar nga listat e deputetëve, që sot sipas thënieve në formë batutash, janë të papunë. Ndoshta edhe mund të jenë të tillë, por ky moment i zgjedhjes së Ruçit, i vuri edhe një herë në qendër të vëmendjes mediatike. Të paktën ata mund të jenë të papunë, por edhe për ca kohë duket se do të jenë aktivë në politikë, edhe përmes komenteve në rrjete apo vëmendjes së mediave. /gj.k//tesheshi.com/
