Serbia dhe Kosova duhet të pranojnë planin e Bashkimit Evropian për normalizimin e marrëdhënieve, i cili është vendimtar për stabilitetin e të gjithë rajonit, tha presidentja e Komisionit Evropian, Ursula von der Leyen.
“Ekziston një plan i Bashkimit Evropian për normalizimin e marrëdhënieve ndërmjet Serbisë dhe Kosovës. Mendoj se është një mundësi për të dyja palët që të përfitojnë nga momenti sepse normalizimi është çelësi për sigurinë, stabilitetin dhe prosperitetin e rajonit”, tha Von der Leyen në një bisedë me korrespondentët e agjencive të lajmeve që marrin pjesë në projektin European Newsroom.
Takimi i fundit në kuadër të dialogut Beograd-Prishtinë me ndërmjetësimin e BE-së u mbajt më 27 shkurt.
Përfaqësuesi i Lartë i BE-së për Politikë të Jashtme dhe Siguri, Josep Borrell tha pas takimit se presidenti serb Aleksandar Vuçiç dhe kryeministri i Kosovës Albin Kurti e kanë pranuar marrëveshjen e ofruar dhe se bisedimet për zbatimin e saj janë në vijim.
Në tekstin e marrëveshjes thuhet se të dyja palët do të zhvillojnë “marrëdhënie normale, të fqinjësisë së mirë të bazuar në të drejta të barabarta”, se do të “njohin reciprokisht dokumentet dhe simbolet kombëtare, duke përfshirë pasaportat, diplomat, targat dhe vulat doganore”.
Në dokument thuhet gjithashtu se asnjëra palë nuk mund ta përfaqësojë tjetrën në sferën ndërkombëtare apo të veprojë në emër të saj dhe se Serbia nuk do të kundërshtojë anëtarësimin e Kosovës në asnjë organizatë ndërkombëtare.
Gjithashtu, asnjëra palë nuk do të bllokojë apo inkurajojë të tjerët që të bllokojnë përparimin e palës tjetër në rrugën e saj drejt BE-së për meritat e saj.
Megjithatë, deklaratat që kundërshtonin disa dispozita të marrëveshjes pasuan shumë shpejt.
Presidenti serb Aleksandar Vuçiç tha se nuk do të pajtohet me anëtarësimin e Kosovës në OKB, edhe pse në marrëveshje thuhet se nuk do ta bllokojë atë.
Kryeministri i Kosovës, Albin Kurti, nga ana tjetër, pas takimit tha se është i gatshëm të nënshkruajë menjëherë marrëveshjen themelore, ndërsa Vuçiç tha se kjo nuk bëhet fjalë derisa Kosova të përmbushë obligimin për krijimin e komuniteteve të komunave me shumicë serbe.
Takimi i radhës mes Vuçiçit dhe Kurtit do të zhvillohet më 18 mars në Ohër të Maqedonisë së Veriut, në prani të Borrellit dhe Lajçakut.
Pala evropiane pret një marrëveshje për planin e zbatimit të marrëveshjes bazë për normalizimin ose të paktën progres të rëndësishëm.
“Shpresoj që të dyja palët të jenë shumë konstruktive në bisedimet e ardhshme”, tha Von der Leyen.
E pyetur nëse do të ketë pasoja nëse negociatat në Ohër dështojnë, Von der Leyen tha se “në fillim duhet të negociojmë dhe vetëm pastaj të shikojmë rezultatin”.
Ajo tha se sulmi rus në Ukrainë theksoi rëndësinë e re strategjike të procesit të zgjerimit të Bashkimit Evropian.
“Lufta në Ukrainë theksoi rëndësinë e re strategjike të zgjerimit. Ne duam t’i afrojmë dhe sa më shpejt BE-së partnerët tanë nga Ballkani Perëndimor”, tha diplomatja e lartë europiane. /tesheshi.com/
