Një vogëlush 6-vjeçar amerikan i cili i ka ofruar shtëpinë e tij bashkëmoshatarit sirian, Omran, fotoja e të cilit në një ambulancë bëri xhiron e botës, i ka dërguar njëherësh dhe një letër presidentit Obama, që gjithashtu po bëhet virale.
Aleksi nga Nju Jorku, e shkroi letrën pasi pa foton e vogëlushit të përgjakur dhe të hutuar, Omran Daqneesh, e cila shkaktoi zemërim në mbarë botën.
Ndërsa Obama, tha se letra kishte ardhur nga një vogëlush i cili “nuk është mësuar të jetë cinik, dyshues ose i frikësuar”.
Video është shpërndarë më shumë se 60,000 herë në Facebook.
“I nderuari president Obama, a ju kujtohet djali i përgjakur sirian i ulur në autoambulancë?”, ka shkruar Aleks në letrën e publikuar nga Shtëpia e Bardhë.
“Ju lutem a mund të shkoni ta merrni dhe t’a sillni në shtëpinë tonë… Ne do t’i japim atij një familje dhe ai do të jetë vëlla yni”.
Obama citoi fjalët e Aleksit në aamitin e Kombeve të Bashkuara për krizën e refugjatëve këtë javë, para se Shtëpia e Bardhë të ketë regjistruar Aleksin duke e lexuar vetë letrën.
“Ne të gjithë duhet të jemi më shumë si Aleks”, shkroi presidenti.
“Paramendoni si do të dukej bota në atë rast, paramendoni sa do të lehtësoheshin vuajtjet dhe sa jetë do të shpëtoheshin”.
Në mediat sociale, shumë përdorues kanë përshëndetur qasjen e presidentit, por dhe letrën e vogëlushit.
“Një djalë 6-vjeçar i cili ka më shumë humanizëm, dashuri dhe mirëkuptim sesa shumica e të rriturve. Respekt për prindërit e tij”, shkruan një grua nga Teksas në Facebook.
“E kam dëgjuar këtë letër edhe më parë, derisa po e lexonte presidenti”, shkruan një tjetër. “Më bëri me lot edhe tani që po e lexoj”.
“Asnjë prej këtyre vogëlushëve të ëmbël, të cilët janë bij të dikujt, nuk janë Skittles”, shkruan ajo, duke iu referuar fushatës kontraverse të Donald Trampit, në të cilën krahasohen refugjatët sirianë me një brend të njohur të ëmbëlsirave.
Presidenti amerikan ka kërkuar prej vendeve të zhvilluara që të bëjnë më shumë për të ndihmuar refugjatët nga kriza siriane. Në gusht, Shtëpia e Bardhë tha se ka pranuar 10,000 refugjatë sirianë në SHBA brenda vitit.
“SHBA-të kanë plan të marrin edhe 110,000 në vitin financiar 2017”, tha Obama. /tesheshi.com/
