Ambasadorja e Bashkimit Europian në Tiranë, Romana Vlahutin, ka fshikulluar opozitën pas qëndrimit të saj se kanë dorëzuar një draft alternative për reformën në drejtësi.
E pranishme në Konventën e Integrimit Europian, e mbajtur me praninë e shoqërisë civile, Vlahutin ka nënvizuar faktin se realizimi i Reformës në Drejtesi është kërkesë e qytetarëve shqiptarë.
“Një hap shumë i madh është tani përpara nesh dhe ne të gjithë duhet të marrim frymë thellë dhe të ecim në nivelin tjetër. Niveli tjetër, më duhet t’ju them që do të jetë edhe më kërkues, por gjithashtu edhe më përmbushës. Kjo është një kërkesë nga qytetarët, nuk është thjesht një mekanizëm i integrimit dhe nuk është vetëm ajo që Komisioni dhe vendet anëtare kërkojnë nga Shqipëria. Është ajo çka qytetarët kërkojnë nga shteti” – deklaroi Vlahutin.
Edhe ministri i Jashtëm, Ditmir Bushati nënvizoi të njëjtin qëndrim me Vlahutin.
“Kjo nuk është një reformë që kërkohet vetëm nga ndërkombëtarët, por në radhë të parë nga vetë shqiptarët”, tha Bushati.
Ndërsa kryetarja e Këshillit Kombëtar të Integrimit, Majlinda Bregu ngriti shqetësimin për mosrespektimin e institucioneve nga politika.
Sipas saj, institucionet në Shqiperi ndryshojnë me ciklet e pushtetit politik, siç ndryshon dhe administrata. /tesheshi.com/
