Vladimir Kosta, deputeti socialist i qarkut të Gjirokastrës, është larguar nga grupi parlamentar i PS-së si shenjë proteste pas kandidimit të Gilberto Jaçes për kreun e bashkisë së Përmetit.
Deputeti Vladimir Kosta tha se vendimi i tij ka të bëjë me pakënaqësitë ndaj kandidatit të mundshëm për Bashkinë e Përmetit dhe për këtë i ka paraqitur dorëheqjen kryesocialistit Edi Rama. Kosta thotë se pa miratimin e tij është vendosur që të rikandidojë Gilberto Jaçe në zgjedhjet e 21 Qershorit. Kosta thotë se është kundër kësaj kandidature pasi Jaçe ka abuzuar me fondet, dhe këtë fakt sipas tij ia ka bërë të ditur edhe kryeministrit Rama.
Ishte ministri i Ekonomisë Arben Ahmetaj i cili zyrtarizoi rikandidimin e Gilberto Jacajt për në zgjedhjet e 21 Qershorit. Ahmetaj zhvilloi një takim me strukturat e Partisë Socialiste në qytetin e Gjirokastrës. Po ashtu, në Tepelenë Partia Socialiste do të garojë me Tërmet Peçin.
Edhe kjo kandidaturë ka hasur pakënaqësi, ku kryetari i komunës Qendër Tepelenë Redi Rama, tha se Peçi nuk do të mund të garantonte fitoren e socialistëve në zgjedhje.
