Edhe pse autoritetet financiare të vendit po lëshojnë deklarata qetësuese, sot ka ardhur një konfirmim zyrtar për herë të parë nga qeveria shqiptare.
Ministri i Financave, Shkëlqim Cani, deklaroi se do të ketë disa pasoja, në radhë të parë eksportet tona drejt Greqisë, të cilat në shumicën e tyre përbëjnë konfeksionet apo ata që cilësohen mallra fason.
Në konferencën e përbashkët për shtyp me përfaqësues të Fondit Monetar Ndërkombëtar, ministri i Financave, Shkëlqim Cani, përjashtoi mundësinë që ekonomia shqiptare të preket fort nga ajo që po ndodh në Greqi. “Efektet e situatës greke në ekonominë shqiptare janë nën kontroll. Së pari, sepse ajo që po ndodh në Greqi, nuk është e re. kemi 5 vjet që ekonomia jonë përshtatet me këtë gjendje dhe aktorët ekonomikë shqiptare kanë arritur të përshtasin planet e tyre për investime apo tregtime të tjera”, tha Cani.
Një nga sektorët që mund të preket më shumë nga një dalje e mundshme e Greqisë nga Eurozona, është ai i eksporteve, por edhe këtu ndikimi është i kufizuar.
“Ulja e fuqisë blerëse në Greqi mund të ndikojë në eksportet tona, por është një çështje për t’u parë me kohë. Ne supozojmnë që do të ulet kërkesa për mallrat shqiptare, megjithatë nuk bëhet fjalë për një ndikim të madh pasi kemi vetëm 5.3 për qind eksporte drejt Greqisë”, sqaroi ministri i Financave.
Sa i përket sistemit bankar, Cani ripërsëriti qëndrimet e shprehura më herët nga specialistët dhe nga Guvernatori Sejko.
“Më me rëndësi është për të theksuar diçka për bankat shqiptare me kapital grek, sepse janë banka shqiptare nga ana ligjore dhe janë tërësisht të shkëputura nga bankat mëmë”, tha Cani. Për ministrin e Financave ndikimet nuk do të jenë vetëm negative, por do të ketë edhe efekte pozitive, në rastin e skenarit më të keq për atë që po ndodh në Greqi. Cani tha se Ministria, Qeveria, Banka e Shqipëri dhe të tjera institucione financiare po ndjekin me kujdes situatën së bashku me partnerët ndërkombëtarë për të minimizuar çdo risk që mund të shfaqet në këtë drejtim./tesheshi.com/
