Një marrëveshje e rëndësishme pritet të nënshkruhet së shpejti ndërmjet Shqipërisë dhe Turqisë që mund të ndryshojë ekuilibrat rajonalë të energjisë. Sipas kësaj marrëveshje OST, pra trasnmetimin e energjisë në Shqipëri dhe Kosovë, madje edhe Maqedoni pritet ta menaxhojnë kompani turke, gjë që do të ndryshojë totalisht situatën duke thyer monopolin serb.
Ministri shqiptar i Energjitikës, Damian Gjiknuri ftoi sipërmarrësit turq për më shumë investime në sektorin e energjisë në Shqipëri.
Gjatë një takimi me ta, ai prezantoi disa nga prioritet e Shqipërisë në këtë fushë, ku përmend dhe ndryshimet e fundit në ligjin e energjisë.
“Po bëjmë investime shumë të domosdoshme në sektorin e shpërndarjes së energjisë, ku përveç një programi të Bankës Botërore, kemi edhe investimet e vetë kompanisë. Po bëjmë investime të mëdha gjithashtu në interkonektivitetin e Shqipërisë me vendet fqinje, sa i përket transmetimit të energjisë elektrike, pra shkëmbim i energjisë elektrike. Të gjitha këto investime kaq të nevojshme në infrastrukturë janë një premisë shumë e mirë dhe një domosdoshmëri për qëndrueshmërinë e investimeve të huaja në prodhimin e energjisë elektrike”, tha Gjiknuri.
Një tjetër fushë e mundshme bashkëpunimi është edhe ajo e gazifikimit. Ministri Gjiknuri u kërkoi sipërmarrësve turq bashkëpunim edhe në këtë fushë, meqë Turqia ka një përvojë të re në këtë drejtim. Ai theksoi se projekti TAP dhe njëkohësisht puna që po bëhet për masterplanin e gazit dhe studimin e fizibilitetit krijojnë mundësi të reja për infrastrukturën e gazit në Shqipëri dhe hapen mundësi të reja investimi.
“Turqia dhe kompanitë turke kanë një eksperiencë edhe në këtë drejtim. Turqia është nga ato vende që gazifikimin e ka filluar në dekadat e fundit, do të thotë që ka një përvojë relativisht të re me gazifikimin. Pra, edhe kjo është një mundësi për kompanitë turke dhe ky është një rast i mirë për të krijuar lidhjet e nevojshme me ministrinë për të marrë informacion në lidhje me zhvillimet e mundshme në këtë drejtim”, vijoi ministri.
Sipërmarrësit turq u njohën më tej me projektet konkrete me mundësi reale investimi në Shqipëri.
