Aleksander Vuçiç ka dërguar në Ankara ministrin e tij të Tregtisë dhe Turizmit, që është njëkohësisht dhe zv.kryeministër, që të përgatisë nga afër vizitën e Presidentit turk Rexhep Tajip Erdogan në Serbi, e cila zhvillohet më 10-11 tetor.
Vuçiç e konsideron shumë të rëndësishme turin politik të presidentit turk, i cili përveç të tjerave do të shoqërohet nga 250 industrialistë të rëndësishëm që do të eksplorojnë që të investojnë në Serbi.
Me një plan preciz dhe shumë të zgjuar, Beogradi ka kërkuar nga Turqia që të investojë në industrinë e lehtë në krahinën e Novi Pazarit, që përveçse është një zonë ku banojnë një popullsi me shumicë myslimane, por edhe është një stabiliment shumë i rëndësishëm i konfeksioneve dhe industrisë tekstile.
Ky plan i Beogradit është lëvizje e zgjuar, pasi edhe afron apo zbut relacionet me boshnjakët e Sanxhakut por edhe siguron një rritje ekonomike për Serbinë.
Në Sanxhak ka fabrika të rëndësishme fasone kryesisht turke të cilat prodhojnë për kompani shumë të famshme botërore duke nisur nga emrat më të rëndësishëm të Alta Moda-s si Armani, Hugo Boss, Dolce e Gabana, Guçi, Versace etj.
Rasim Lajiç është një boshnjak i Sanxhakut dhe i përket besimit mysliman.
Pikërisht për të treguar marrëdhëniet me boshnjakët dhe me myslimanët Beogradi ka pasur gjithmonë një anëtar qeverie nga Novi Pazari.
Vetë Lajiç është në qeverinë serbe në poste të ndryshme që nga rënia e Slobodan Milosheviçit.
Vuçiç e emëroi zv.kryeministër dhe ministër i tregtisë, pikërisht pas zgjedhjeve presidenciale, pasi mori shumë vota në Sanxhak.
Siç bën të ditur televizioni serb B92, Erdogan do të firmosë gjatë vizitës së tij në Serbi Marrëveshjen e Tregtisë së Lirë mes dy vendeve, e cila konsiderohet shumë e rëndësishme.
Në këtë marrëveshje do të rriten shumë sasia e mallrave që do të eksportohen nga të dy vendet. /tesheshi.com/
