Nga Blendi Gashi
Pak ditë mbas vizitës së kryekuvendarit të Shqipërisë, Ilir Meta, në Prishtinë, ku takoi drejtues të AAK-së së Ramush Haradinajt, pas ndalimit të këtij të fundit në Francë, një gjë të tillë sot e bëri edhe kryeministri Edi Rama.
Ashtu edhe siç pritej, Rama e dënoi ndalimin e Ramushit nga autoritetet franceze, duke e cilësuar një proces tërësisht të tepërt, me shpresën që do lirohet shumë shpejt, ndërsa falënderoi Aleancën për mikpritjen.
Në një paraqitje para mediave së bashku me nënkryetarin e AAK-së Ardian Gjini, kryeministri Rama tha se me drejtuesit e Aleancës diskutuan për situatën në tërësi dhe sfidat e përbashkëta.
“Unë uroj dhe besoj që procesi i Ramushit do të jetë përfundimi që ne duam. Nuk është fundi, por fillimi i një pune të përbashkët i dy qeverive për të fshirë përfundimisht këto lista njerëzish me urdhër-arreste të një kohe që i përket të shkuarës dhe na shfaqen në këto forma që na kujtojnë që e shkuara është një kërcënim për ne; ta bëjmë të shkuarën të pakthyeshme,” tha ai.
Siç mund të kuptohet, Rama ka premtuar angazhim të përbashkët të qeverive për shlyerjen e fletarrestimeve. Por ai nuk tregoi se si do e bëjë këtë dhe pse nuk ka pasur një angazhim të tillë gjatë katër viteve sa është kryeministër.
Prandaj, në vend të fjalëve miradije për Ramushin, sot qytetarët kanë pritur nga Rama të tregojë se ç’kontribut ka dhënë ai si kryeministër i shqiptarëve në ndihmë të Kosovës për t’i shlyer urdhër-arrestet serbe, kur dihet se miku i tij Haradinaj edhe më parë është arrestuar po me urdhër të Serbisë.
Por, jo, Rama nuk tha asnjë fjalë për këtë. Foli në kohën e ardhshme, duke thënë se “dy qeveritë do punojnë për shlyerjen e urdhër-arresteve serbe”.
Rama është dashur të tregojë nëse çështjen e fletarrestimeve e ka ngritur apo jo gjatë takimeve me homologun e tij serb Vuçiç. Nëse po, çfarë i ka thënë homologu serb? Nëse jo, pse nuk e ka ngritur këtë problematikë?
Andaj, duke lënë shumë mjegull pas, ngrihet dilema në mos vallë një vizitë të tillë e bëri sa për të thënë se edhe ai po interesohet për Haradinajn? Apo ndoshta për të fituar edhe më shumë simpatinë e kosovarëve?
Pavarësisht të gjitha pyetjeve që mund të shtrohen, Rama duhet ta dijë se nuk mjaftojnë vetëm fjalët miradije, por si kryeministër duhet të bëjë edhe më shumë se kaq.
Sa u përket falënderimeve për mikpritjen, duhet ta dijë se në Kosovë do jetë i mirëpritur çdo herë, dhe nuk ka pse të falënderohet. Mikpritja dihet se është traditë e shqiptarëve! /tesheshi.com/
