Siç dhe pritej, nderimi i Gramoz Ruçit nga ana e Presidentit Thaçi me “Urdhrin e Lirisë”, është pritur me kritika nga një pjesë e opinionit, në Shqipëri e Kosovë gjithashtu. Kjo, për shkak të të kaluarës komuniste të kryeparlamentarit të Shqipërisë, ndonëse nuk është i vetmi si “ish”, por fati e ka dashur që ai të jetë ministër i Brendshëm në një kohë të trazuar, në fundin e regjimit hoxhist.
Por përse ky nderim, përsje kjo medalje lirie për njeriun e identifikuar si mishërim i robërisë ideologjike? Thaçi, në motivacionin e tij, e ka përligjur këtë me kontributin e Ruçit për lirinë e Kosovës e më pas pavarësinë e saj. Por dhe në këtë pikë, kujtesa kolektive nuk arrin të bëjë ndonjë lidhje të drejtpërdrejtë mes kësaj figure dhe kauzës kosovare.
E megjithatëm, ja që ekziston. I përket vitit historik 1999. Kosova po përzhitej nga flakët e luftës, e Shëipëria nga ato të politikës, pas rënies nga pushteti dy vite më parë të Berishës. PD protestonte në sheshin Skënderbej, dhe kjo ishte e papranueshme për Ruçin, që gjithashtu shprehte dhe qëndrimin e PS-së.
Ja dhe fjalimi i Ruçit më 23 mars 1999:
Grupi i Partisë Socialiste përshëndet raportimet që bëri këtu Kryeministri, zoti Majko, Ministri i Mbrojtjes, zoti Hajdaraga dhe ai i Jashtëm, zoti Milo. Njëherësh përshëndesim edhe pjesëmarrjen në këtë seancë jo të zakonshme për situatën në të cilën ndodhemi, të Presidentit të Republikës, zotit Mejdani. Do të ishte mirë që me ne të ishin bashkuar sot edhe karriget bosh të opozitës shqiptare, por, për fatin e keq tonin,… në sheshin “Skënderbej”, kur sot pas një ore a pas një dite Kosova digjet, për fat të keq Berisha krihet. Sigurisht kjo është zgjidhje e tij, megjithatë ne mendojmë e gjykojmë që asnjëherë nuk është vonë për të korrigjuar, më mirë vonë sesa kurrë, thotë populli, prandaj apeli që ne i lëshojmë opozitës shqiptare është të bashkohet me qëndrimin politik të forcave progresive dhe me veprimtarinë konkrete dhe praktike të institucioneve shqiptare.
Ne si maxhorancë e Parlamentit përshëndesim aktin e firmosjes nga pala shqiptare të marrëveshjes së përkohshme për paqen dhe për vëtëvendosjen e Kosovës, si një hap jo vetëm i mirëpritur, por edhe i hedhur në kohën e duhur dhe në drejtimin e duhur për aspiratat e ligjshme të popullit të Kosovës për liri, paqe dhe stabilitet.
Ne socialistët shqiptarë përshëndesim bashkëpunimin e ngushtë të institucioneve shqiptare me faktorin politik ushtarak dhe institucional të Kosovës, për qëndrimin dhe veprimin e mençur dhe kurajoz, politik dhe diplomatik të njësuar me atë të faktorit ndërkombëtar.
Ne socialistët shqiptarë përshëndesim përpjekjet, angazhimin dhe këmbënguljen e faktorit ndërkombëtar në përgjithësi dhe atij amerikan në veçanti për gjetjen e një zgjidhjeje paqësore dhe afatgjatë për çështjen e Kosovës. Por, nga ana tjetër, grupi ynë parlamentar gjykon dhe vlerëson se nuk ka vend aspak për vetëkënaqësi, pasi me gjithë përpjekjet tona, të faktorit kosovar dhe atij ndërkombëtar momenti në të cilin ndodhemi është momenti më i rrezikshëm. Pritmëria se ç’do të bëjë Milosheviçi është katastrofale, agresioni serb çdo orë është në rritje, prandaj ai patjetër duhet ndërprerë. Qëndrimi dhe pozicioni ynë i palëkundur nga fillimi ka qenë dhe mbetet se i vetmi faktor që mund të ndalë atë është forca e faktorit ndërkombëtar në përgjithësi dhe e NATO-s në veçanti me prezencën e saj për të mos lejuar tragjedi të mëtejshme.
Nga ana tjetër, ne si maxhorancë ju drejtohemi juve, zoti President edhe si Komandat i Përgjithshëm, se keni të gjithë mbështetjen tonë, të maxhorancës parlamentare, në përmbushjen e detyrës suaj që jua kërkon Kushtetuta dhe ligjet për Forcat e Armatosura të Republikës së Shqipërisë për mbrojtjen dhe sovranitetin e vendit tonë. Nga ana tjetër, zoti Ministër i Mbrojtjes, ne i përshëndesim hapat e ndërmarrë nga dikasteri juaj dhe si maxhorancë ju japim të gjithë mbështetjen tonë morale dhe politike Forcave tona të Armatosura kudo që janë të vendosura ato dhe se ne deputetët shqiptarë do të jemi në një llogore me ta në qoftë se do të cenohet liria, pavarësia dhe sovraniteti i vendit tonë.
Zotërinj të ekzekutivit shqiptar, kërkoj nga ana juaj paraqitjen sa më të shpejtë të projektligjeve përkatëse të çdo vakuumi ligjor që rrjedh nga Kushtetuta e Shqipërisë për Forcat e Armatosura apo për të përballuar situatën në të cilën ndodhet vendi ynë në këto momente.
Së fundi, është në të mirën e situatës që Komisioni i Jashtëm, Komisioni i Mbrojtjes dhe Komisioni i Rendit dhe i SHIK-ut në çdo moment të ndodhen pranë dikastereve përkatëse për të ndjekur në vazhdimësi situatën dhe për të ndërmarrë hapa konkretë dhe, në radhë të parë, ne legjislativi shqiptar.
Përgatiti: Ermir Hoxha – /tesheshi.com/
