Kryetari i Lëvizjes Vetëvendosje, Visar Ymeri ftoi për debat publik, kryeministrin Isa Mustafa në lidhje me krijimin e Asocacionit të komunave serbe. Ymeri thotë se Mustafa ka gënjyer pareshtur në intervistën dhënë një natë më parë në television dhe se ka shumë gjëra që duhen sqaruar për publikun.
“Në emisionin e mbrëmshëm në RTK Isa Mustafa për asnjë moment nuk e foli të vërtetën për Marrëveshjen. Herë thoshte se Zajednica nuk ka kompetenca ekzekutive, e pastaj thoshte se edhe ashtu komunat me shumicë serbe kanë pasur më shumë kompetenca se sa komunat tjera. Që i bie se e drejta për t’i përbashkuar këto kompetenca në një instancë më të lartë se niveli lokal, e më të ulët se ai qendror, e bën Zajednicën pushtet të tretë, autonom, në dëm të Kosovës dhe kundër Republikës”, shkruan kreu iVetëvendosjes në një postim në Facebook.
Ai vijon me konstatimin e paqartësive në deklaratat e Mustafës sidomos sa i takon përputhshmërisë me ligjet e Kosovës të Asocacionit.
“Pse paska nevojë për një Marrëveshje kompromisi për ta zbatuar Kushtetutën? Nëse është kështu që komunat me shumicë serbe e paskan pranuar zbatimin e Kushtetutës së Republikës!, dhe se Serbia e paska pranuar në mënyrë indirekte Republikën e Kosovës!, atëherë këtu nuk kemi kompromis, por fitore bindëse të Republikës së Kosovës”, shkruan ai.
“Në vend se të kërcënojë me gjuhë ‘burrnie’, Isa Mustafa duhet ballafaquar me argumene”, përfundon Ymeri duke e ftuar Mustafën në një debat public.
“Mediumin dhe gazetarin le ta zgjedhë ai se kështu është mësuar”, ka shkruar Ymeri. /tesheshi.com/
